Compilatiecorpus Historisch Nederlands 1.0 (CHN): ambtelijke teksten 1250-1800: brugge_1381_2

<begin>
Wie pieter van oostbuerch ende zegher honin Scepenen Jn brucghe in dien tiden dat dese dinghen voor ons waren ghedaen doen te wetene allen lieden
</begin>
<main>
dat cam voor ons Als voor scepenen Jan vander meersch filius Symoens ende kateline zijn wijf Ende gauen halm ende wettelike ghifte broeder pieter den weese ende broeder nicasus den wulf beede broeders vander darder hordine van enen huus staende in den custincwech an de westzide van der strate vp den noordoost houc vander sceltstrate naesten haerlieder huus die van den becgaerden [i]n den vorseiden cuertrijcwech af een zide ende Jan pitackers huus in de vorseide sceltstrate af ander zide vp sabts ende scouents land vanden eechoute Ende Jan van den meersch ende kateline zijn wijf vorseit wedden ende beloueden den vorseiden broeder pieter den weese ende broeder nicasus den wulf dit vorseide huus staende ter vorseider stede ghelike dat vorseit es te wetten te waerne ende te warandeerne met al dat den vorseiden huus toebehoord voren bachten ende an allen ziden eertvast ende nagheluast der aues te haerlieder vrije eghindomme broeder pieters ende broeder nicasus vorseit tieghen elken meinsche met achte sceleghen parisisen siaers vten vorseiden huus gaende ten rechten landcheinse
</main>
<end>
Jn kennessen van desen dinghen hebben wie scepenen huuthanghende beseghelt met onsen zeghelen dit was ghedaen jnt jaer M ccc een ende tachtentich vpten achtiensten dach van ougstmaend
</end>