Compilatiecorpus Historisch Nederlands 1.0 (CHN): ambtelijke teksten 1250-1800: brugge_1382_1

<begin>
Wij Buerghmeesters Scepenen ende Raed vander stede van brucghe Doen te wetene allen den ghenen die dese letteren zullen zien af horen lesen
</begin>
<main>
dat wij aneziende ende wetende dat dher pieter de moer Ende dher pieter zeghers onse ghesellen in de wet ghesent hebben ghesiin bi ons omme beloeuers te zine vander stede weghe van brucghe van twintich scotters ende een vout serganten ghesent in de poert van ardenburgh omme die te verwaerne ieghen den [oueren] wille van die van ghend daer zij gheleghen hebben zesse ende viertich daghe te gadre ende voort dher pieter vorseid alleene tweehondert ende viere ende vichtich daghe met alsulken ghesinde alse hemlieden toebehoorde ende oorboorlijc was ende ghetrouwelike ghedaen verwarende haerlieder last ter eere van onsen gheduchten prinche ende ten behoude van zinen lande van vlaendren Jnt welke de vorseide her pieter costen ghedaen heeft ende tsine grotelike vtegheleit also haerre beeder Rekeninghe te gadre ende tser pieters Rekeninghe bi hem te vullen verclaersen die zij der of met Tresoriers ghedaen hebben Jn de welke Rekeninghe men den her pieter vorseid tachter es vanden vorseiden costen bouen dat zij vander vorseider stede ontfanghen hebben vier waerf twintich pond ende viue scele grote tornoisen de welke somme van peneghen wij den vorseiden her pieteren gheassignert hebben ende bewijst assigneren ende bewisen te heffene ende te ontfanghene metgaders den her zegher honin ende den her vincente vanden moere die int ghelike gheleghen hebben te Curtrike vp de Rechte heltsceede vanden profiten die commen ende vallen zullen in den handen vander vorseider stede vander assise vanden hoppenbiere zo welken tiden dat de scotters der of betaelt zullen wesen vanden assignemente dat hemlieden der up ghedaen es die vorseide heltsceede vander assise vanden oppenbiere ontfanghende metgaders den her zegher en den her vincente vorseid elc van hem drien ziin auenant tote der tijt ende der wilen dat hi vander vorseider somme van peneghen van zinen vorseiden costen betaelt sal wesen
</main>
<end>
Jn kennessen van welken dinghen hebben wij dese letteren huuthanghende beseghelt metden groten zeghele vander vorseider stede van brucghe dit was ghedaen int jaer ons heren M ccc een ende tachtentich vpten eersten dagh van sporkelle
</end>