Compilatiecorpus Historisch Nederlands 1.0 (CHN): ambtelijke teksten 1250-1800: brugge_1384_1

<begin>
Wie Jan heldebolle Ende pauwels heins Scepenen jn brucghe in dien tiden dat dese dinghen vor ons waren ghedaen doen te wetene allen lieden
</begin>
<main>
dat Cam vor ons als vor scepenen willem scuereul die men heet van steenwille ende scalt quite jacob den heict ende woutre coopman als tresoriers vander stede van brucghe te dien tide van al den goede dat zij onder hem ende in haerlieder handen ghehadt mochten toebehorende janne scuereul svorseids willems scuereuls broeder was ten tiden dat hi leuede dwelke vorseide goed hemlieden in handen gheleit was ter stede bouf als omme dat de vorseide jan scuereul bastaerd zoude hebben ghesijn ende voord van allen heesschen sculden ende calaengen tote den daghe van heden commende ende sprutende vanden vorseiden goede in zo wat manieren dat het mach zijn zonder fraude ende zonder malengien
</main>
<end>
Jn kennessen van desen dinghen hebben wij scepenen vorseid dese letteren vuthanghende beseghelt met onsen zeghelen dit was ghedaen int jaer ons heren M CCC drie ende tachtentich vpten zeuentiensten dach van laumaend
</end>