Compilatiecorpus Historisch Nederlands 1.0 (CHN): ambtelijke teksten 1250-1800: brugge_1408_1

<begin>
</begin>
<main>
Ute dien dat te diversen stonden questie gheweist heift voor schepenen van Brugghe van panden die ten woukeraers ghedreghen worden de welcke den goeden lieden dien zy toebehoorden ghestolen of ontdregen hebben gheweist by haren boden of andere daeraf men in diversen tyden diverschelike gheuseirt heift te wisene so was over een ghedreghen by den ghemeenen hoop van scepenen van Brugghe dat zo wanneer eenich gestolen of ontdreghen goet ghedreghen worde teenighen van de wouckeraers huuse binnen Brugghe evenverre dat de ghone dien tvoorseide goed toebehoort mach doen staen met goeden lieden weerdich van trauwen dat alzulc goed hem toebehoort ende dat het hem ghestolen of ontdreghen es dat hy dan zyn voorseide goed vry weder hebben zal zonder den voorzeiden wouckeraers yet daeraf te ghevene van principale of van woukerghelde vutegesteken de groote caoursine alwaert dat tvoorseide goet ghestolen hadde ghezin of ontdreghen
Ende al dierghelike was ghewyst by den voorseiden ghemeenen hoop van scepenen vp tghestolen goet dat ghecocht worde als dat de ghone dien tvoorseide goet toebehoort zyn voorzeide goet vry weder hebben zal evenverre dat hy mach doen staen voor scepenen dat het hem toebehoort als hyt laetsten zach ende
dat hem ghestolen was vtegesteken goed dat in vrye jaermaercten ghecocht heeft ghezijn
</main>
<end>
Actum den xien dach van maerte int jaer M IIIIe ende achte
</end>