Compilatiecorpus Historisch Nederlands 1.0 (CHN): ambtelijke teksten 1250-1800: brugge_1419_1

<begin>
</begin>
<main>
Ute dien dat Jacop van der Tolne ende Marie Weyts zyn wettelike wyf de welcke midts dat zy niet wel over een hebben konnen draghen eenen zekeren tydt versceeden hebben gheweist ende zident den voorseyden verscheedene groot gheschil ghehadt hebben omme tsoccusoens wille van haren ghemeenen goede daeraf elc themwaert ghetrocken hadde tgoend dat hy hadde connen ghecrighen mids welcken zy te diversen stonden deen den andren in de camere van Brugghe betrocken hadden So syn de voorseyde Jacop ende Marie omme een goed hende van den voorseyden zaken te vercrighene ende omme paisivelike verscheeden te moghene bliven bleven int zegghen ende in dordenancie van eerweerdighen vader in Gode minen heere den abt van den Eechoute in Brugghe Lodewike van Zarren Jorise Gremmen nu ter tydt scepene ende meester Janne den Mil secretaris van der stede van Brugghe in zulker maten dat zo wat de voor seyde zegghers vp tgoent dat voorseyt es zegghen ende ordeneren zouden dat beloefden de voorseyde partien te houdene goet vast ende ghestade Bider macht van welcken bliverscepe de voorseyde zegghers hebben vpten dach van heden gheseit ende gheordeneirt in der manieren hier naer verclaerst Eerst dat elc van den voorseyde persoonen hebben ende behouden zal over zyn vry eyghen goed al tgoend dat hy wech ende te hemwaert heift zonder daeraf yet deen den andren weeder te keerene
Item dat zy ghemeene vercoopen zullen thuus dat zy staende hebben in de nieustraete daeraf de voorseyde Jacop hebben zal tien pond grooten ende voorseyde Marie tremanant
Item dat elc van den voorseyden persoonen betalen zal zine sculde Ende zo vele doen an de ghone die hemlieden gheborcht hebben dat zy de sculde houden zullen an de ghone van hem beeden diese ghemaect heift
Item dat de voorseyde Marie hebben sal vry ende behouden al de verstervenesse haer toecommen by der doot van harer moeder
Item dat de zelve Marie vry hebben zal ende behouden tstal dat zoe staende heift in de vaute van der halle met al der coopmanscepen die daer in es ende toebehoort Ende waert dat omme tiden toe te commene de voorseyde Marie tvoorseyde stal vercoopen wilde zo zal Jacop voorscreven ghehouden zyn daeraf te buten te gaene daert behoort
Voort dat de lettren van douaryen die de voorseyde persoonen deen den andren ghegheven hebben ghescuert zullen zyn ende van gheene waerden
Ende mids desen zeide de voorseyde zegghers dat de voorseyde Jacop ende Marie gheen vploop doen zullen deen den andren met woorden noch anderssins maer paisivelike verscheeden bliven vp tgoent dat voorseit es tot der tyd ende der wilen dat God harer beeder herten bekeert zal hebben
</main>
<end>
Actum den achtsten dach van april int jaer duust vierhondert ende neghentiene
</end>