Compilatiecorpus Historisch Nederlands 1.0 (CHN): ambtelijke teksten 1250-1800: brugge_1424_1

<begin>
</begin>
<main>
Van den ghescille dat was in den ghemeene hoop van scepenen van Brugghe tusschen Janne van den Hamme ende Stevine den Snic wettelicke vooghde van Franskine ende Claerkine den kindren van wilen Stevine den Snic poorters van Ypre an deen zyde ende Pietren Christiaens als ghetrauwet hebbende teenen wettelicken wive Beatricien Jacoppe de Herlaere als ghetrauwet hebbende Jacqueminen ende Gillise Scuuf als ghetrauwet hebbende Kathelinen alle dochteren van wilen Jane van Thorout alle poorters in Brugghe an dander zyde Begheerende de voorseyde vooghde uter naeme van de voorseyde kinderen te hebbene zeker goed bleven naer de doodt van wylen Lysbetten van Thorout den voorseyde Franskins ende Claerkins grootevrauwe was als van haerlieder moeder zyde onlanx leden ghestorven binnen der voorseyde stede van Brugghe daerop de voorseyde Pieter Jacop ende Gillis zeiden dat der voorseyde kindren moeder bastaerde dochter was van de voorseyde Lysbetten van Thorout ende dat by dien de voorseyde vooghde uter naeme van den zelven kindren niet sculdich en waren van der voorseyde Lysbetten te deelene daerop de zelve vooghde weder zeiden dat de voorseyde kindren ghetrauwede kindren waren ende dat by also dat haerlieder voorseyde moeder gheleift hadde zoe ghedeelt zoude hebben van de voorseyde Lysbetten harer moeder ende dat by dien zonderlinghe aenghesien dat de voorseyde kindren van wettelicke bedde zyn also voorseit es zy sculdich waren ende zyn te stane ende te commene in de stede van haerlieder voorseyde moeder ende te deelene van haerlieder voorzeyde grootevrauwe ghelyc datde zelve haerlieder moeder doen zoude vp dat zoe noch leifde daeraf de voorseyde Pieter Jacob ende Gillis in den naeme als boven als deghoene die hemlieden als aeldinghers droughen van der voorseyde Lysbetten van Thorout de contrarie mainteneirden zegghende dat nietjeghenstaende dat de voorzeyde kinderen van ghetrauweden bedde zyn de zelve kinderen nochtan niet deelen zouden dan alleene van der moeder ende van haerlieder voorseyde grootevrauwe noch voorder up waert niet
So was by den voorseyden ghemeenen hoope van scepenen van Brugghe ghehoort hebbende al tgoent dat de voorseyde partien an beeden zyden hier vp zegghen wilden ende ripelike daervp ghelet Gheseit ende verclaerst dat na den wetten costumen ende usagen van der stede van Brugghe de voorseyde kinderen aenghezien dat haerlieder moeder bastaerd was niet deelen zouden noch schuldich waren te deelene van haerlieder grootevrauwe voorscreven
</main>
<end>
Actum den laetsten dach van sporcle int jaer m IIIJe XXIIIJ
</end>