Compilatiecorpus Historisch Nederlands 1.0 (CHN): ambtelijke teksten 1250-1800: brugge_1430_1

<begin>
</begin>
<main>
Vpten zestiensten dach van novembre int jaer M cccc ende dartich was zeker verclaers ghedaen bider ghemeenre wet ende biden notablen vander stede vp de fayten ende twisten die ghevallen vp andre heerscepen dan binden scependomme van Brucghe omme socoysoens wille daer omme dat wettelike varde of wettelic zoendyng binder stede van Brugghe ghenomen of ghemaect hebben ghezyn of omme wettelicheden dat bi scepenen van Brugghe of bi eenighen andren wetten vander stede van Brugghe ghewyst of ghehandelt hebben ghesyn inder manieren hier naer verclaerst
Eerst van allen fayten of twisten die ghevallen vp andre heerscepen dan vp tBruxsche daer of dat den principalen twist ter vierscare van Brugghe niet behoort berecht te zine te wat steden dat het zy binnen wetteliker varde of wetteliken zoendinghe ende omme tsocoysoens wille daer omme dat zy ghenomen of ghemaect hebben ghezyn bi wetten vander stede van Brucghe sal men moghen halen de wettelike vardebrake ofzoendingbrake metter goeder waerhede ter vierscare voor scepenen van Brugghe binnen jare ende binnen daghe naer dat den twist ghevallen sal zijn Ende so wie die bedreghen wert metter goeder waerhede dat hi wettelike varde of wettelic zoending te broken zal zyn al voren de wettelike varde of wettelic zoendinc bekent zynde sal men bannen te wetene Die wettelike varde te broken zal hebben c jaer ende eenen dach huuten lande van Vlaendren vp zyn hooft van vardebraken ende die wettelic zoendinc te broken sal hebben c jaer ende eenen dach of tusschen c jaren ende eenen daghe vp zyn hooft naer tverclaers vanden previlegen vander stede van Brugghe Emmer den heere ende partyen onverlet blivende omme wetten daer den principalen twist ghevalt te hebbene dat zy sculdich zyn te hebbene metten rechten
Voort van allen twisten ende fayten die ghevallen vp andre heerschepen danne vp tBruxsche daer of dat den principalen twist ter vierscare van Brugghe niet behoort berecht te sine omme tsocoysoens willen van eenighen wettelicheden die bi scepenen of bi eeneghen andren wetten vander stede van Brucghe ghewyst of ghehandelt heeft ghesyn zal de ghuene die mesdaen es metsgaders de buerchmeester van den courpse ter vierscare van Brugghe eesschen ende halen moghen den ban vp den mesdoenre bider goeder waerhede het zy x jaer of also langhe als scepenen goed sal dincken omme dat hi omme tsocoysoens wille vander wettelichede den twist ghestoort heift Ende daer partye te wetten niet achtervolghen en wille so salt de buerchmeester vanden courpse alleene moghen achtervolghen ende eesschen metter goeder waerhede ende dat binnen jaere ende daghe naer dat den twist ghevallen sal syn Emmer den heere ende partye onverlet blivende omme te hebbene den principalen twist ter plaetsen daer hi gheviel te hebbene dat zy sculdich zyn te hebbene metten rechten
Ende es te wetene dat de partyen die hare zaken te wetten achtervolghen willen het zy van vardebraken van zoendinebrake of omme tsocoysoens wille van eenighen wettelicheden dat die schuldich zyn hare claghe te doene voor scepenen van Brugghe binden darden daghe naer dat tfait ende twist vp hemlieden gheschiet zal zyn naer tverclaers van den previlegen
</main>
<end>
</end>