Compilatiecorpus Historisch Nederlands 1.0 (CHN): ambtelijke teksten 1250-1800: brugge_1432_1

<begin>
</begin>
<main>
Van den ghescille dat was in den ghemeenen hoop van scepenen van Brugghe tusschen Cornelise van den Waele in den name van Marien zinen wive sheer Pieter Naeyers bastaerde dochtere of eene zyde ende Janne den Nayere fs Andries Janne den Puut ende Joorise Jooris als aeldinghers van den rechten vierendeelen van der verstervenesse die bleven es naer den voorzeyden heer Pietren den Naeyere of ander zyde Commende ende sprutende van zes brieven de viere bezeghelt met scepenen zeghelen van Brugghe ende dander twee met scepenen zeghelen van den Vryen de welcke bevonden waren in een slot bin den huuse daer de voorseyde heer Pieter in staerf
Ende by ghescille dat de voorseyde aeldinghers ende Cornelis hadden omme elc de brieve te hemwaerts te hebbene so waren de voorseyde brieven brocht by Jacoppe Breydel ende Pietren Dop tresoriers te dien tyden midts dat de stede aeldinc was van den vierden 1 vierendeele van den voorseyden heer Pietren den Nayer mids dat hy bastaerd was in scepenen handen
De welcke brieven daer laghen tote dat de voorseyde partien quamen in de camere ende begheerden wet van haerlieder ghescille
Ende naer den eessche van der eenre partie ende der antwoorde van der andere ende ooc nader informatien diere scepenen alvooren of ghehoort hadden so was ghewyst vpten xxijen dach van october int jaer M IIIJe XXXIJ in der maniere hier naer verclaert te wetene
Eerst dat Jan de Nayere ende zyne medepleghers behouden zullen eene quictancie die mentioen maect dat dheer Pieter de Nayere of eene zyde ende Cornelis van den Wale ende Marie zyn wyf of anderw zyde elc andren quiteghescolden hebben van allen eeschen sculden ende calaignen ende dat midts dat dien te nieuten bliven zal eene weddinghe van acht ponden grooten die de voorseyde heer Pieter de Nayere ghewet heeft Janne van Zomerghem svorseyts Maeykins bouf svorseits heer Pieters Nayers kind
Voort dat de voorseyde Cornelis behouden zal de twee chaertres bezeghelt met scepenen zeghelen van den Vryen mentioen maeckende van dertich scellinghen grooten lyfrenten siaers die staen ten live van den voorseyden heer Pieter den Nayer ende Maeykine ende ten lancxsten live van hem beeden vp diversche parcheelen van landen ende dit midts dien de voorseyde lyfrente payement was van vichtien ponden grooten in minderinghe van den vichtig ponden groote die de voorseyde Cornelis met zinen wive hadde in huwelike daerof dat scepenen alvoren wel gheinformeirt waren
Voort dat Cornelis ende zyn wyf behouden zullen den chaertre van eenre ghifte mentioen maeckende dat Jan Cockuut ghifte gaf Janne van Zomerghem te Maeykins bouf sheer Pieter Nayers bastaerde dochtre van tween huusen staende in de zwarte ledertauwers strate
Ende voort dat noch de vorseyde Cornelis ende Marie zyn wyf behouden zullen den chaertre van ghiften die dheer Pieter de Nayere ghegheven heift den vorseyden Janne van Zomerghem te Maeykins behouf sheer Pieter Nayers bastaerde dochtre van twee huusen staende bachten freren muere in manieren waert dat tvorseyde Maeykin storve ende van den live ter doodt quame zonder wettelic hoir van haren lichame commende ende naer haer te live blivende dat danne de voorseyde twee huusen weder commen ende keeren zullen vpten vorseyden heer Pieter de Nayere vp zyn wettelic hoir daer zy schuldich zyn te gaene ende te keerene metten rechte ende van deze chaertre moghen de aeldinghers hebben hebben vidimus daert hemlieden ghelieft
</main>
<end>
Actum den xxijen dach van October anno M IIIJ XXXIJ
</end>