Compilatiecorpus Historisch Nederlands 1.0 (CHN): ambtelijke teksten 1250-1800: brugge_1435_1

<begin>
</begin>
<main>
Vte dien dat naer de dood van Lipkine Bettin Berthelmeeus Bettyns bastaerden kinde dat hy hadde by Ghisele Cans Berthelmeeus de Voocht onlancx leden schoutete van Brugghe hand ghesleghen hadde an tgoed van den vorseyden Lipkine als bastaerde goed ende daerop composicie ghemaect metter vorseyde Ghisele Cans als moeder van den vorseyden Lipkine omme de somme van zestiene ponden grooten die de voorseyde scoutete ons gheduchts heeren behouf van Bourgoigne grave van Vlaendren boven allen lasten van utinghen en sculden hebben zoude Ende het also zy dat hier naer te wetene binnen jare ende daghe naer de doodt van den vorseyden Lipkine Bernaerd Bettin als broeder ende aeldinc van den vorseyden Berthelmeeuse Bettin ende by middele van dien aeldinc van den vorseyden Lipkine hier omme in den ghemeenen hoop van scepenen van Brugghe betrocken hadde Tassard Brisse als naercommere van den vorseyden Berthelmeeuse in tvorseyde officie van den scoutetendomme van Brugghe ende last hebbende alzo hy verstaen hadde omme dese zaeke te bescuddene Begheerende an hem dat hy zinen hand lichten zoude van der vorseyde composicie ende hem van svorseyde Lipkins goede laeten ghebruken ende dit midts dat de vorseyde Berthelmeeuse Bettin in tyden verleden te wetene int jaer M IIIJe XVlJ den vorseyden Lipkine ghegheven hadde dartich pond groote by conditien waert dat tzelve Lipkin quame alzoot commen es van live ter dood zonder wettelic hoir achter hem te latene dat de vorseyde xxx l gr wederkeeren zouden vp svorseyts Berthelmeeus aeldinghers alzo de voorseyde Bernaerd dadt dede bliken by zekeren lettren daerop ghemaect voor scepenen van Brugghe vpten xxixen dach van Meye in tvorseyde jaer M IIIJe XVIJ
Daerop de vorseyde Tassart verandwoorde kennende dat hy van den vorseyden Berthelmeeuse zinen voorzaete tzynre bede last ghenomen hadde te desen zake te verandwoordene ende zegghende al mochte de vorseyde Berthelmeeus Bettin zinen vorseyden kinde de vorseyde somme van xxx l gr ghegheven hebben te wederkeerene nietmin hy meende dat dit de zelve somme niet en was maer was eene andere begheerende mids dien dat de vorseyde composicie stedehilde ende dat de vorseyde Bernaerd zine vorseyde somme van xxx l gr haelde vp de voochden van den vorseyden Lipkine vp datter eenich goed overscote
Den voorseyden Bernaerd begheerende de contrarie te wetene van den voorseyden xxx 1. gr ouds ghelts te ghebrukene
So was by den ghemeenen hoope van scepenen van Brugghe vorseit gheinformeirt te vullen van den state van svorseits Lipkins goede gheseit ende ghewyst dat de vorseyde scoutete sculdich es zine hand te lichtene van der vorseyde composicie ende den vorseyden Bernaerd van den vorseyden daertich pond grooten ouds ghelts te latene ghebruken
</main>
<end>
Actum den viijen dach van Ougste int jaer M IIIJe XXXV
</end>