Compilatiecorpus Historisch Nederlands 1.0 (CHN): ambtelijke teksten 1250-1800: brugge_1438_1

<begin>
Allen den ghonen die dese lettren zullen zien of hooren lezen Borchmeesters scepenen ende raed van der stede van Brugglie Saluut
</begin>
<main>
Vte dien dat joncvrouwe Lysbette Pieter Dops dochtere oud zynde beneden den vive ende twintich jaren hebbende vader ende moeder in wiens bescermenesse ende vooghdie zoe was verleet habbe gheweest vte haers vaders ende moeders huus bi Rogiere de Heedene fs Michiels gheboren van Roesselare bi voorzienen rade omme huwelic metten voorseiden Rogiere te doene also zoe ghedaen heift
Omme welc faits wille vpten twintichsten dach van Wedemaend in dit jeghenwordighe jaer M CCCC achte ende dartich ten vervolghe van den heer Gillise Laureins als borchmeester van courpse vander stede van Brugghe de voorseyde Rogier bi scepenen van Brugghe in ghebanre vierscare ghewyst hadde gheweest wetteloos ende daertoe ghebannen hondert jaer ende eenen daeh vten lande van Vlaendren vp zyn hooft ende voort al tgoed dat hi hadde vp de tyd als tvorseyde fait gheschiede ghewyst verbuert daerof hebbende onze harde gheduchte heere ende prince deene helftscheede ende de stede van Brugghe dandere helftscheede
Ende voort al tgoed dat de voorseyde joncvrauwe vp de selve tyd hadde verbuert wesende daer af hebbende onze gheduchte heere ende prince teen vierendeel de stede van Brugghe een vierendeel ende tnaeste ombeiaerde hoir dandere helftscheede ende daer zoe gheen ombeiaerde hoir en hadde danne hebbende onze gheduchte heere deene helft ende de stede van Brugghe dandere helft Ende bovendien dat der voorseyde joncvrauwe Lysbetten nemmermeer goed versterven en mach van haren aeldinghers ghelyc of zoe dood laghe vp den vloer
Ende het also zy dat tprincipaelste goed dat de voorseyde joncvrauwe Lysbette hadde waren twee leenen die de voorseyde Pieter cochte wilen met zinen propren goede daer in hi zine voorseyde dochtere dede erven behouden den voorseyden Pietre ende joncvrauwe Barbelen zinen wive de gheheele bilevinghe vanden voorseyden twee leenen haerlieder leven lanc gheduerende gheleghen de voorseyde leenen teen in de prochie van Leffinghe groot vive ende viertich ghemeten lands eene line ende liij roeden of daer omtrent ghehouden van onzen voorseyden harde gheduchte heere ende prince van zynre borch van Brugghe ende tandere leen groot wesende vyf ghemeten eene line ende tsestich roeden of daer omtrent gheleghen inde prochie van Ettelgheem ghehouden van Janne Stevins ende Victor Kersteloots zone van welken leenen trechte vierendeel der voorseyde stede van Brugghe toebehoort bi cause vanden voorseyden vonnesse ende bi causen vanden zelven vonnesse de helftscheede vanden voorseyden leenen Loikin Dop svoorseyts Pieters zone als tnaeste onbeiaerde hoir vander voorseyde joncvrauwe Lysbette
So eist dat wy doen te wetene dat wy vter name vander voorseyde stede van Brugghe vercocht hebben ende bi desen lettren vercoopen den voorseyden Pietren Dop svoorseyts Loikins zyns kinds behouf trechte vierendeel vanden voorseyden twee leenen inder zelver voormen ende manieren dat tzelve vierendeel der voorseyde stede van Brugghe toebehoort bi causen van den voorseyden vonnesse Ende dit omme eene zekere somme van penninghen die wy vter name vander zelver stede van Brugghe kennen vanden voorseyden Pieter Dop ontfanghen hebbende
Ende mids desen zo hebben wy vpghedreghen ende draghen vp bi desen lettren den voorseyden Pietren Dop svoorseyts Loikins zyns kinds behouf tvoorseyde vierendeel vanden tween leenen omme tzelve Loikin daer af te ghebrukene als van zinen propren goede ghelyc dat de voorseyde stede van Brucghe bi causen vanden voorseyden vonnesse ghebruken zouden moghen
</main>
<end>
In oorcontscepen van welken dinghen hebben wy dese lettren ghedaen zeghelen metten zeghele van zaken vander voorseyde stede van Brugghe Ghemaect ende ghegheven int jaer ons Heeren M CCCC achte ende dartich vpten xxsten dach van Ougste
</end>