Compilatiecorpus Historisch Nederlands 1.0 (CHN): ambtelijke teksten 1250-1800: brugge_1440_1

<begin>
Alle etc borchmeesters etc salut
</begin>
<main>
Ute dien dat Thomas Verbeele fs Lambrechts Verbeele Jacop Dammaert Jan Maes Margriete Laurette ende Janne alle zeven Verbeelen fs Jacops kinderen gheaennevaert ende te hemwaerts ghetrocken hebben de helftscheede vanden verstervenesse ende goede blevende na de dood van wilen heer Caerle Carels capelaen vande kerke van sinte Donaes in Brugghe als van svorseids heer Carels moeders zide ende daeraf meenen te verstekene ende te weerene Jacop Carels Ballinx Janne Weermout fs Jans ende Aechte Veermouts Jans Robs weduwe dewelke Jacob Jan ende Aechte mainteneren also wel ende also naer deelachtich te zine inde vorseide verstervenesse als de voornoemde persoonen So eist dat wy certifieren ende oorconden bi desen onsen lettren dat ter begheerten van de voorseide Jacop Carels Janne Weermout ende Aechte Weermouts bi ons commen zyn vp ten dach van heden Jan Bengiaert fs Jans oud lxvj jaer ende Adriaen Willemszone oud lj jaer beede van de prochie van Breedene de welke ghevraecht vp te zibbe vanden voorzeide Janne Weermout hebben ons verclaerst ende gheoorcondt bi haren eeden hemlieden hoogheden vpghestaeft tgoend dat hier na volght te weten
Dat hemlieden wel kenlic beede van hooren zegghene haren voorders ende anderssins dat Jacop Verbeele dhoude ende Lambrecht Verbeele doude broeders waren commende van ghethrauwde bedde ende dat de zelve broeders in wettelicken huweliche hadden twee ghezusteren Van Oostende te weten de voorseide Jacop Verbeelen Katheline Smichts ende de vorseide Lambrecht Heylzoete Smichts der vorseide Katheline zustere Ende dat de vorseide Jacop Verbeelen doude hadde bi de vorseide Kathelinen zinen ghetrauweden wive vier kinderen te wetene Lambrecht Heinric Jacop ende Margriete
Zeiden voort de vorseide Jan Bengiaert ende Adriaen dat hemlieden wel kenlic es dat de vorseide Lambrecht Verbeele fs Jacop hadde bi Kathelinen zinen ghetrauweden wive den vorseiden Thomaes Verbeelen levende vp ten dach van heden
Item dat de vorseide Heinric Verbeelen fs Jacop hadde bi Margriete zine ghetrauwede wive de vorseide Janne Verbeelen levende vp ten dach van heden
Item dat de vorseide Jacop Verbeelen fs Jacob hadde bi Margrieten zinen ghetrauweden wive de voorzeide vij kinderen te weten Jacob Dammaert Jan Maes Margriete Laurette en Janne alle levende vp ten dach van heden
Ende dat de vorseide Margriete Jacops Verbeelen jhoudere dochtere hadde ghetrauwet eenen Jan Bengiaerts biden welken zoe hadde den vorseide Janne Bengiaert dien spreict
Zeiden voort de zelve Jan Bengiaert ende Adriaen dat hemlieden wel kenlic es bi hooren zegghene harer voorders ende andersins dat de vorseide Lambrecht Verbeelen dhoude de welke ghetrauwet hadde de vorzeide Heylzoet Smichts hadde bi de zelve Heylsoet eene dochtere gheheeten Margriete ende dat hemlieden wel kenlic es dat de voorseide Margriete ghetrauwt hadde eerst eenen man gheheeten Carel Wouter Ballynx biden welken soe hadde eenen zone ghelieeten Jacop Carelszone Ballynx ende daer na trauwede zoe eenen anderen man gheheeten Janne Weermout biden welken zo hadde twee kinderen te wetene Janne Weermout ende eene dochtere gheheeten Aechte die nu weduwe es van Janne Robs alle drie levende vp ten dach van heden
Biden welken het blyct dat de vorseide Maes Verbeelen Lambrechts zone Jan Verbeelen fs Heinricx Jacop Dammaert Jan Maes Margriete Laurette ende Janne svorseids Jacops Verbeelen Jacop zoons kinderen rechtelike anderzweers zyn van den vorseiden Jacoppe Ballinx Janne Weermout fs Jans ende Aechten Weermouts commende alle van vader ende moeder weghe van den vorseiden Jacoppe Verbeelen doude ende Lambrechte Verbeelen doude die twee broeders waren ende twee ghesusteren ghetrauwet hadden also voorseit es
</main>
<end>
In oorcontscepen etc iij in wedemaend
</end>