Compilatiecorpus Historisch Nederlands 1.0 (CHN): ambtelijke teksten 1250-1800: brugge_1442_1

<begin>
</begin>
<main>
Upten heesch ghedaen by Jacoppe Melanez uter name van Janne Machet ende voort als machtich van Manuel Duquyn joncvrauwe Lukinen Constans Berthauts wedue te wetene van der somme van vyftich pond ende achtiene grooten uter name van Janne Machet van der somme van xij l xiiij sc gr als machtich van Manuel vorseit
Daerop dat de zelve joncvrauwe Lukine zeyde dat zoe van de voorseide scult niet en weet noch den voorseyden Constant haren man hadde hooren kennen of verlyen
Zo was by den voorseyden ghemeenen hoope van scepenen van Brugghe gheseit ende ghewyst dat de voorseyde joncvrauwe Lukine haren eed doen zoude ende by dien verclaersen tgoent dat scepenen haer vraghen zoude
Den eed ghedaen ende by dien haer ghevraecht zynde of zoe yet wiste van desen tween sommen of datse die haren man heift hooren lyen of yet betaelt wesen mochte Ende by den voorseyden eede verclaersende dat zoe van de voorseyde scult zoe noeiit ne wiste noch ooc den voorseyden haren man die hooren kennen of verlyen noch bevonden in ziine bouken zo was de zelve joncvrauwe by den voorseyden ghemeenen hoope van scepenen van Brugghe ghewyst los ledich ende quite van den voorseyden heesche die haer te wetten by den voorseyden Jacoppe aengheleyt hadde gheweist
</main>
<end>
Actum den Ven dach van meye int jaer M IIIJe XLIJ
</end>