Compilatiecorpus Historisch Nederlands 1.0 (CHN): ambtelijke teksten 1250-1800: brugge_1461_1

<begin>
</begin>
<main>
Up de questie wesende tusschen Cornelie Pieter Baerts wyf als heesscheghe of een zyde ende Jan Speghele de houde als procureur van Ghiselbrecht van der Scuere goudsmet van Ghent als verweerer of ander zyde ter causen van eener graeuwer rieme met verghuldenen beslaghe die de voorseide heesscheghe anevaerd hadde als huer toebehoorende ende die zoe corts te voren verloren hadde ende huer ghestolen ende vute hueren huuse ontvreemt ghezyn hadde de voorseide verweerer sustinerende dat zyn meester de voorseide rieme duechdelicke ghecocht hadde in de maerct ende wel betaelt ende begheerde emmer [ zoude hy van den rieme moeten sceeden ] dat hy weder hadde tghelt dat hy daer vooren ghegheven ende betaelt hadde de voorseide heesscheghe sustinerende ter contrarie met zekere redenen die zoe daer toe zeide
So was by den ghemeenen college van scepenen van Brugghe verclaerst dat de heesscheghe sculdich was ende es weder thebbene den voorseiden rieme de voorseide verweerer houdende ende halende zyn warant an den ghonen diese vercochte of andere daer ende alsoot behooren zal
</main>
<end>
Actum xiijen in meye anno lxj
</end>