Compilatiecorpus Historisch Nederlands 1.0 (CHN): ambtelijke teksten 1250-1800: brugge_1461_2

<begin>
</begin>
<main>
Vpte questie wesende voor tghemeene college van scepenen van Brugghe tusschen Lauwers vander Clite heeschere in dese instantie an deep zijde ende joncvrauwe Jehane Jan Rauleers wedewe an dandere zyde zegghende de voorseyde Lauwers dat de voorseyde wedewe hem hadde ghedaen vanghen in den steen te Brugghe tonrechte ende met quaeder cause begheerende ontsleghen te zine of dat zoe hem dade verclaers van heessche ende hy zouder vp verandwoorden alzo hem redelicke dincken zoude
Daervp de voorseyde weduwe verantwoorde dat zoe den voorsevden Lauwers wettelic hadde ghedaen vanghen ende omme ghewysde zake ende dat mids dien hy sculdich ware ghevanghen te blivene omme ghewysde zake te Brugghe ende dat zoe mids dien niet sculdich en was ander verclaers van heessche te doene
Den voorseyden Lauwers daer jeghen zegghende dat zoe emmers verclaers van heesche sculdich was te doene midts dat hy haren heesch ter vierschare niet ghehoort en hadde maer was aldaer verwonnen by contumacien tonrechte ende onghehoort
De voorseyde weduwe daervp weder zegghende dat al wast zo dat zoe van rechts weghe gheen verclaers van heesche sculdich en was te doene nochtanne omme haer zelven te quictene ende te betooghene dat zoe goet recht daertoe hadde consenteerde verclaers van heesche te doene ende zeyde dat de voorseyde Lauwers in tyden verleden bevoorwaerde ende cochte jeghens Jan Rauledere haren man doe was den zelven Lauwers te diere tydt wesende hostelier ende makelare te Brugghe te een zyns gast behouf als hy zeyde neghen last caeck harincx vul ende zoete metter ronne van Biervliet te vij l vj sc elc last bedraghende te gadere de somme van lxv l xiiij sc grooten vlaemsscher munten den zelven Jan Rauleder ghevende zine lettren van obligacien onder zine zeghele ende gheteekent met zinen handteekene renunchierende poorterie ende allen anderen vryheden haer dies vermetende inde voorseyde lettren van der date van den xxiiijen daghe van octobre int jaer M IIIJe XXXIIJ die zoe over leyde zeyde voort dat de voorseyde Lauwers zekeren tydt van jaren vertrac buter stede van Brugghe met alle zynder hebbinghen daer hy hem totte noch toe ghehouden heeft zeyde voort dat zoe naer de doodt van den voorseyden Jan Rauleder haren man tgoed van haren voorseyden man gheanneveert heeft ende dat omme betaelinghe thebbene van der somme van lxj l xiiij sc grooten als reste van de voorseyde lxv l xiiij sc groote zoe den voorseyden Lauwers als poortere betrocken hadde ter viersschare van Brugghe daer zoe den zelven Lauwers gheachterhaelt heeft by contumacie van de voorseyde somme haer dies vermetende vp tregister van den ghedinghen van der voorseyde stede van Brugghe ende ter causen van dien heift den voorseyden Lauwers by Janne van Houtvivere haren procureur ghedaen vanghen ende bevolen ten steene over de voorseyde reste alzo zoe dat wel doen mochte ende begheerde dat hy daer bleve tot hyse vuldaen hadde of ghecreghe haer ghemoede
Daervp de voorseyde Lauwers verandwoorde dat hy tonrechte ghevanghen was ende mids dien sculdich was ontsleghen te zyne by den redenen hier naer verclaerst Eerst dat naer den previlegien rechten ende wetten van der stede van Brugghe men elcken poortere sculdich es tontbiedene te rechtstane te zinen huuse of te zyner laetster woonste Item dat naer de costumen van der voorseyde stede zo wie ghevanghen es in den steen van Brugghe al heeft hy in de stede wyf ende kinderen men die pleicht tontbiedene te rechtstane voor den steen maintenerende by dien dat de steen es de wueninghe van elcken persoone diere in ghevanghen es in den steen Item ende en mach de voorseyde wedewe niet ignoreren de voorseyde Lauwers en heeft in den voorseyden steen ghevanghen gheweest vier of vyf jaer binnen welcken tyde zyn huus daer hy woonde ende zine catheylen ofghewonnen waren ende vercocht Item ende hem ooc ghevanghen zynde was by scepenen van Bruggbe ghebannen vten lande van Vlaendren ende alzo als ballync vten steene gheleet maintenerende by dien dat de voorseyde steen zine laetste woonste was binder stede van Brugghe daer hy nochtanne niet gheboden en was Ende al ware de steen zine laetste woenste niet twelcke ja nochtanne zeyde ende mainteneirde hy dat de voorseyde wedewe hem tonrechte hadde ghedaen vanghen by dat men useirt te Brugghe als eenich poortere buten woenende ontboden es ter viersschaere dat men an hem eenen dienare zende omme zyn ghebod hem te kennene te ghevene te dien hende dat hy hem comme bescudden ter viersschare vp dat hem ghelieft Zeyde voort de voorseyde Lauwers dat int jaer LIIJ zyn ban vte ghinc ende alzo cam dickent te Brugghe logieren ten huuse van Morissus van Varsenare zynen neve met zinen scamelen state vte ende in gaende etende ende drinckende zegghende by dien dat zine laetste woonste was daer hy ooc niet ontboden en heeft ghezyn slutende by de voorseyde redenen dat hy te ziner laetster woonste niet ontboden en was ende dat by dien de contumacie vp hem vercreghen niet sculdich en es te bindene ende dat tvorseyde vanghen sculdich es van onweerden te ziine
De voorseyde wedewe daer jeghen zegghende ende maintenerende dat hy wel ende wettelic ghevanghen es ende alzo sculdich ware ghewesen te zine by den redenen naervolghende
Eerst want hy gheboden was ter plaetsen daer hy laetst woonde binder stede van Brugghe met zynen wyve kinderen ende hebbinghen te wetene in de steenstrate in de herberghe ten Herte twelcke zine laetste woonste was naer der costume onderhouden binder stede van Brugghe ende niet de voorseyde steen van Brugghe daer hy langhe ghevanghen was want al eyst zo dat als een persoon in den steen ghevanghen es gheboden es te rechstane dat en doet men niet als te zynder woonste maer als te zine persoone die men daer vindt ende als alzulc persoon vter vanghenesse gheraect ende trect vter stede men moet die ghebieden ter laetste woonste eer hy in den steen gherochte haer dies vermetende in de rechten ende als van den huuse van Morissus van Varssenaere zeide ooc dat dat zine laetste woonste niet en was want hy daer verkeerde heymelicke zonder daer thebbene wyf kynderen ende hebbinghen ende zonder last te draghene metter neeringhe van de makelaers daer in hy was zonder bescreven te zine in den bouc van de poorters buten wonende die plaetse ghecoren hadden slutende als boven dat de voorseyde Lauwers wel wettelic ghevanghen was met meer woorden die de voorseyde partien overghaven in ghescriften
So was by den ghemeenen college van scepenen van Brugghe naer dat zy hemlieden hadden ghedaen informeren van de vermeten van de vorseyde partien ghezeyt verclaert ende ghewyst dat tvanghen ghedaen by den voorseyden Janne van Houtvivere als machtich van de voorseyde wedewe wel ende wettelicke ghedaen was ende alzo sculdich was van weerde te blivene
</main>
<end>
Actum vje augusti anno M CCCC LXJ
</end>