Compilatiecorpus Historisch Nederlands 1.0 (CHN): ambtelijke teksten 1250-1800: brugge_1462_1

<begin>
</begin>
<main>
Vpte questie ende ghedinghe hanghende voor tghemeene college van scepenen van Brugghe ter camere tusschen Pieter Rephin als bezittere van alle den goede wylen ghemeene tusschen hem ende joncvrauwe Clare Berthelmeeus Bortoens dochtre zyn wyf was bin haren levene ende ghemeene ende onverdeelt den voorseyden Pietre ende zinen kinderen die hy hadde byder voorseyde Joncvrauwe Clare als heesschere ende begherere an deen zyde ende Anthuenis Moens ende Adriaen Caervoet als voochden van Joosse Copkin Pierkin ende Hannekin svoorseyts Pieters kinderen ende Wouter Rephin oom van de voorseyde kinderen adjoinct verweerers an andere
Ter causen dat de voorseyde Pieter begheerde te verdeelne ende verscheeden te zine jeghens zine voorseyde kinderen also wel van den ervachteghen goedinghen lyfrenten ervelicke rente als van de catheylen ende roerende goeden ende zyn parcheelen vp hem zelven thebbene zeggende ende maintenerende dat naer ghemeene recht ende ooc de rechten ende wetten van de voorseyde stede van Brugghe ghemerct datter noch privilegie noch costume es ter contrarie hem dat sculdich es te gheschiene begheerde ende verzochte dat de voorseyde voochden vter name van de voorseyde kinderen ende also zy procederen daer toe by vonnesse ghewyst ende ghecondempneirt thebbene
De voorseyde vooghden sustinerende de contrarie ende zeyden hoe dat naer den overlydene van de voorseyde Joncvrauwe Clara svoorseyts Pieters wyf ende moeder van de voorseyde kinderen overmids dat die de ghone doe vooghden waren ende met den voorseyden Pietren niet veraccorderen en consten van de verstervenesse van de voorseyde Joncvrauwe Clara de voorseyde vooghden die doe waren ontboden den voorseyden Pietren voor deelmannen ende dat daer zo verre gheprocedeirt was dat hendelicke by de voorseyde deelmannen ten verzoucke ende begheerte van de voorseyde partien ghewyst was dat alle de ervachtichede beede van huuse ende lande ervelicke renten ende lyfrente in de deelrolle begrepen bliven zouden ghemeene te wetene dat de voorseyde Pieter als bezitter hebben zoude de heltscheede ghemeene ende onverdeelt ende de voorseyde kinderen metgaders meester Cornelis Rephin dandere heltscheede metten renten ende lasten diere jaerlicx vte ghaen ende daer vp bezet zyn Ende dat zo wanneer yemende eeneghe deelen van parcheelen toegheleyt of by vonnesse aenghewyst zyn zo dese voorseyde kynderen zyn by den voorseyden vonnesse van deelmannen dat die naer den ouden rechten wetten ende costumen van Brugghe zo vry es ende staet dat men die parcheelen niet ontdeelen noch ontlooten en mach ten zy by zinen propren wille ende consente zegghende alzo recht ende wet zynde ende costume binnen der voorseyde stede van Brugghe dat de voorseyde Pieter sculdich es alzo verre alst aengaet der ervachtichede goedinghen ghemeene ende onverdeelt met zine voorseyde kynderen te blivene tenderende ende concluderende tontgaene ende quicte ghewyst te zine van zinen voorseyden heessche ende begheerte
Daer jeghens de voorseyde Pieter repliquierende zeyde ontkennende dat zulc vonnesse te zine verzoecke of begheerte ghegheven hadde gheweest ende al mocht zo wesen dat de voorseyde deelmannen wat ghewyst ende ghezeyt hadden also de verweerers zegghen nochtan en zoude dat vonnesse ende wysdom hem niet moghen bejeghenen noch prejudicieren als gheledenen in crachte van ghewysder dinc anghezien dat de voorseyde pieter hem altoos beclaecht heeft ende al noch beclaecht ter causen van dien niet en heeft willen voort gaen in de verdeelinghe van de catheyliike goedinghen porrende ooc de voorseyde eerste voochden ter causen van dien voor scepenen ende daer de voorseyde verweerers zegghen willen dat recht ende oude costume es dat zo wanneer yement eeneghe parcheelen van erve toegheleyt ende anghewyst zyn bij vonnesse dat men hem die niet ontdeelen [etc] kent dat de rechten ende costumen zulc zyn dat zo wanneer yement eeneghe parcheelen van erve toegheleyt zijn bij verdeelinghe of gherechteghe vonnesse dat men die parcheelen niet ontdeelen noch ontloten en mach hopte dat ooc niet bevonden en zal zyn dat hij zijne voorseyde kinderen eeneghe parcheelen ontloten of ontdeelen wilde slutende als boven mids de voorseyde redenen ende middelen ten verdeelne ende zijne parcheelen op hem zelven thebbene als boven
De voorseyde verweerers dupliquierende vp de voorseyde licesschere replique zeyden ende andwoorden eerst daer de voorseyde heesschere ontkent tvonnesse van deelmannen ghegheven zynde te zyne verzouke [etc] presenteerden dat te prouvene met deelmannen haerlieder registre ende anderssins also daertoe behooren zoude nemende thueren voordeele de kennesse van den voorseyden rechte ende costume by den voorseyden heesschere ghedaen te zine replique ende sustinerende dat dat ghenouch es om thuerlieder meenynghe te commene Ende daer de voorseyde heesschere zegghen wille in zine replique dat tvoorseyde vonnesse van deelmannen hem niet bejeghenen en can ghemerct dat hij altoos begheert heeft te verdeelene ende also niet ghepasseirt en es in crachte van ghewysder dinc dupliquierden de voorseyde verweerders dat tvoorseyde vonnesse sculdich es als ghepasseirt ende staende in crachte van ghewysder dinc jeghens den voorseyden heesschere te sorterene effect want de voorseyde heesschere jeghen tvoorseyde vonnesse niet gheprocedeert en heeft by appellatie of reformatie emmer bin behoirlicker tydt
Sustinerende de voorseyde partien met meer redene ende middelen in huerlieder scrifturen ende proces begrepen zyn voortstel ende debaterende de redene ende middelen van malcandere
Zo was by scepenen van Brugghe voorseyt de voorseyde partien al int langhe ghehoort ende haerlieder scrifturen ghezien ende ghevisiteirt by avise cade deliberatie van rade ende vp al tguent dat ter materie dienen mochte ripelicke ghelet den voorseyden heeschere zinen heesch ende begheerte aenghewyst te wetene dat hy zal verdeelen ende verscheden jeghen de voorseyde verweerers vter naeme van de voorseyde kinderen ende dat hy zyne parcheelen vp hem zelven hebben zal ende condempneren ende wysen daertoe by desen haerlieder vonnesse de voorseyde verweerers compenserende de costen om zekere redenen hemlieden daertoe porrende van deser instancie
Ende omme ter voorseyde verdeelinghe te commene zo was by scepenen voorseyt gheordonneirt dat de voorseyde verweerere ghenomen twee of drie van de naeste vrienden met hemlieden van de voorseyde kinderen verghaderen zullen metten voorseyden heesschere omme vriendelicke te verdeelene ende daer zy niet verrccorderen en consten dat zy commen metten ghescille voor scepenen ende men zalse veraccorderen
</main>
<end>
Actum xxj in wedemaent anno M IIIJe LXIJ
</end>