Compilatiecorpus Historisch Nederlands 1.0 (CHN): ambtelijke teksten 1250-1800: brugge_1469_2

<begin>
</begin>
<main>
Vpte questie ende ghescil gheresen voor tghemeene college van scepenen van Brugghe ter camere tusschen Coppin Pieters Maertin Pieters bastaerde zone die hy hadde by Clare Phelips vander Biest dochtere die dezelve Phelips vander Biest hadde by Katheline Heinric Meeus dochtere zinen wive heesschere an deen zyde
Ende Pieter Margriete ende Amele svoorseyts Heinric Meeus kinderen metgaders Cornelis Brughman Willem Brughman ende Anthuenis Brughman alle kinderen van wylen Lysbetten Meeus ooc svoorseyts Heinric Meeus dochtere haerlieder zustere alle als hoirs aeldinghers ende deelnemers van Adriaen vander Biest svoorseyts Phelips vander Biest ende Katheline Meeus zone svoorseyts heesschers oom van zynre voorseyde moeder weghe poortere van der stede van Brugghe gestorven aldaer verweerers an dander zyde
Ter causen van dat de voorseyde Coppin begheerde te deelne int goed bleven naer de doot van den voorseyden Adriaen zinen oom
Daer jeghen de voorseyde Pieter Meeus ende zine medepleghers verandwoorden ende zeyden dat de voorseyde Coppin bastaerde zone was van den voorseyden Pieter Maertins 1 ende Clare vander Biest ende dat also achtervolghende den rechten wetten costumen ende usaigen van de voorseyde stede van Brugghe van ouden tyden onderhouden hy niet sculdich en was van yemende te deelne dan alleenicke van zynre voorseyde moedere
Daer jeghen de voorseyde heesschere zeyde repliquierde ende zeyde kennende dat hy bastaert was maer dat hy van zyne voorseyde moedere niet ghedeelt en hadde ende dat hy alzo sculdich was van den voorseyden Adriaen vander Biest fs Phelips zinen oom te deelne naer de wetten rechten costumen ende usaigen van der voorseyde stede
Ende de voorseyde Pieter Meeus ende zine medepleghers sustinerende ter contrarien
So was by den voorseyden ghemeenen college van scepenen van Brugghe ghehoort de voorseyde partien an beeden zyden int langhe in al tguend dat hy hadde willen zegghen ende allegieren ende gheconsidereirt al tguend dat te considererene was in deze zake ende vp al ripelicke ghelet ghezeyt ghewyst ende verclaerst dat de voorseyde Coppin niet sculdich en es te deelene int goed bleven naer de doot van den voorseyden Adriaen vander Biest zinen oom van zynre moedere weghe Ende dit achtervolghende den rechten wetten costumen ende usaigen van de voorseyde stede van Brugghe
</main>
<end>
Actum xje january anno M CCCC LXIX
</end>