Compilatiecorpus Historisch Nederlands 1.0 (CHN): ambtelijke teksten 1250-1800: brugge_1480_1

<begin>
</begin>
<main>
Eerst dat alle poorters ende poorterssen van de voorseyde stede van Brugghe die beziect ende lazarus uteghegheven zullen worden byden meestere ende andre daertoe gheordonneirt int voornoomde godshuus ende zys versoucken ende begheeren int zelve hof ende godshuus ter voorseyde Magdaleenen ontfanghen zullen worden evenverre dat zij datte begheeren ende calengieren binnen den veertichsten daghe naer den voorseyden vutghevene welcken veertichsten dach overleden niement daerinne ontfanghen en zal zijn ten ware by specialer gracien van der wet voochden ende meestre van den voorseyden godshuuse Dies worden zij ghehouden daerinne te brenghene Te wetene die ghehuwet es ende kinderen heift teen dardendeel van alle zijne goedinghenende van den andren tween dardendeelen zal twyf of de man diere ghezondt blijft tandre dardendeel hebben ende huerlieder kyndt of kynderen tarde dardendeel Ende die ghehuwet es ende gheene kynderen heift zal int voornoemde godshuus bringhen de rechte helftscheede van alle zijne goedinghen Ende die onghehuwet es zal alle zijne goedinghen int voornoemde godshuus moeten bringhen Ende en zal gheen persoon bezyect zijnde int voornoemde hof of godshuus moghen wonen met wive oft kynderen
Item dat de meestere vande voorseyde godshuuse ende andre die de visitacie hebben omme de ghene te visiterene die berucht zijn of fame hebben van beziecktheden van dien niet hebben ofte nemen en zullen ter causen van dat die ghevisiteirt of bezien zal werden uteghedaen dat de beleeders ende ommeloopers vanden voorseijden ziecken hebben zullen twee grooten van elcken persoon die zij omme ghevisiteirt ende bezien te wordene zullen ten voorseyden hove
Item dat negheene persoonen die beziect uteghegheven zullen worden op eenich vanden vier sticx omtrend der stede van Brugghe wonen noch commen en zullen moghenn evenverre datter poorters of poorterssen van der voorseyde stede beziect wesende zyn die daeroppe wonen ende zullen alzo de voorseyde poorters ende poorterssen van der voorseyde stede van Brugghe danof de bate ende voordeel altoos hebben ende behouden ende en zullen ooc vppe de voorseyde vier sticx gheene ziecken moghen wonen danne die byden voornoemden hove ter Magdaleene uute ghegheven zijn
Item dat alle poorters ende poorterssen die voordanne beziect vutghegheven zullen worden by den voornoemden hove commen zullen moeten metter wone int voornoemde hof ende godshuus ter Magdaleene of op eenich vande vier sticx daer toe gheoodonneirt ten ware by consente ende specialer gracien van der wet van Brugghe ende voochden van den voorseyden Magdeleene die datte consenteren zullen zonder yet daerof thebbene
Item zo zal elc beziect persoon die int voornoemde hof ende godshuus ontfanghen zal worden eene camere stofferen ende zal al dat elc beziect persoon daer heeft ende brynct den voornoemden godshuuse ende hove naer zijnen overlijdene blijven ende toebehooren zonder yemende anders eenich recht daeran te hebbene
Item evenverre dat eeneghe persoon beziect ute ghegheven zijnde ende int voornoemde hof ende godshuus ter Magdaleenen ontfanghen waere eenich goet verstorve hoedanich dat waere dat datte behooren ende bliven zoude den voorseyden hove ende godshuuse dies zal de persoon dien dat verstorven ware de bladinghen ende proffyeten van dien jaerlickx commende heffen ende hebben alzo langhe als hy leven zal ende zal ooc de voorseyde beziecte ende hem datte ghelieft metten verstorvene goede van den hove vertrecken als hem datte verstorven es behouden dat hij int voorseyde hof laten zal al dat hy van te vooren daer ghebrocht heift
Item zo en zal niement int voornoemde godshuus ende hof moghen commen ende de aelmoesenen hebben ten zij dat hij zuver ende net zij van allen verwaten ende schulden Ende bij alzo dat hij int voornoemde godshuus ontfanghen zijnde sculden maecte daer en zal tzelve godshuus niet inne ghehouden zijn noch die betalen
</main>
<end>
alle dese voornoemde articlen ende poincten staen ende zijn gheregijstreirt inden bouck van den cueren binder stede van Brugghe
Gheteeckent J DE TAYEF
</end>