Compilatiecorpus Historisch Nederlands 1.0 (CHN): ambtelijke teksten 1250-1800: brugge_1481_1

<begin>
</begin>
<main>
Ute dien dat men van oude tyden gheuseirdt ende ghecostumeirdt heift binnen deser stede van Brugghe de poorters van der zelver stede als zy mallicanderen betrecken ende te wette stellen voor scepenen van Brugghe ter camere te zendene ende te renvoyerene ter vierschare alst deen van den partien begheerdt ende versouct also wel angaende de questien ende gheschillen die tusschen den voorseyden poorters rysen ter cause van coopmanschepen als anders Ende dat by dien de heesschers ende de ghone die haerlieder goedt ende coopmanschepen vercocht ende gheleverdt hebben derven moeten haerlieder pennynghen huerlieder grooten quetse scade ende achterdeele mids dat men de vierschare niet en houdt dan te zekeren tyden ende dat also ende by dien de poorters van deser voorseide stede schuwen ende laten met mallicanderen coopmanschepe te doene ende meer gheneghen ziin de voorseyde coopmanschepe te doene ende te antierene metten vreimden die zy ter camere ontbieden ende betrecken mueghen daer men alle daghe partien berecht ende expedicie doet twelke comt ten grooten quetse verminderthede ende achterdeele van der coopmanschepe ende van den ghemeenen oorboor ende proffyte van der voorseyde stede van Brugghe So eyst dat omme daer inne te voorziene de goede lieden van der wet by goeder deliberacie ende rypheyt van rade ende hier vp ghehadt tadvys van den notablen van der zelver stede gheordineirt ende ghestatueirdt hebben dat van nu voortan de poorters van al den questien ende gheschillen die tusschen hemlieden rysen zullen ter causen van coopmanschepen mallicandren betrecken zullen moghen ende te wette stellen voor scepenen van Brugghe ter camere ende aldaer recht ende wet ghenieten zonder dat de verweerere zal moghen begheeren de vierschare ghelijc ende in der manieren dat men van ouden tyden onderhouden heift tusschen den vreimden of den poorters ende den vreimden
</main>
<end>
</end>