Compilatiecorpus Historisch Nederlands 1.0 (CHN): ambtelijke teksten 1250-1800: brugge_1485_1

<begin>
</begin>
<main>
Up de weesecamere den vierden in juillet anno LXXXV doe was gheconsenteirt by mynen heeren vanderwet hooftmannen ende dekenen van der stede mids notable ende ghecommitteirde hoe dat men betalen zouden achtervolghende een voorghebodt ghedaen binder maend van juing te wetene zo wie arresteire zoude ende bringhen in sheeren handen den persoon van Jan van Riebeke zouden hebben c lb groten Willem Moreel c lb gr Lodewyc Steylin l lb gr Zeghin van Rooden l lb gr Anthuenis Labbe l lb gr ende Jan van Oorscamp l lb gr Dus achtervolghende tvoorseide voorghebodt zo was aldoe gheconsenteirt als boven te betalene Joorkin Witweyts ende zinen medepleghers de somme van c lb gr te wetene over ende uter name van Zeghin van Rooden ende Anthuenis Labbe over elcken persoon l lb gr achtervolghende de ghebode van dien ghedaen Voordt zo was ooc aldoe gheconsenteirt als boven dat men alle de goedinghen toebehoorende Lodewyc Steylin ende Anthuenis Labbe zoude stellen in sheeren handen ter stede behouf midsgaerders dat zy handelaers gheweist hadden van alle incommende renten ende ghelde van de voorseide stede omme daermede betaelinghe te doene den sculden die zy de voors stede sculdich ende tachter zouden mueghen zyn ter causen van huerlieden ontfanghen van der voors stede goedt als boven
</main>
<end>
</end>