Compilatiecorpus Historisch Nederlands 1.0 (CHN): ambtelijke teksten 1250-1800: brugge_1494_1

<begin>
</begin>
<main>
1. Men gheift te kennene hoe achtervolghende tghuend dies voortyds te meer stonden gheboden ghezyn heeft omme de groote ghebreeckenw die de overziendres ende scepenen van weesen daghelix bevinden also wel vanden principalen goedinghen van weesen ten boucke te bringhene als anders dezelve overzienres ende scepenen van weesen ghesloten hebben alle maendaghe ende donderdaghe voor de noenne ten berechte van alle sticken den weesen anneghaende te zittene Uten welken men ghebiedt dat alle de ghuene die vooghden zyn van weesen poorters ende poortessen zinde van deser stede van Brugghe ende also inde protexie ende beschermenesse staende van scepenen van Brugghe vppervooghden van alle weesen onder hemlieden verweest zynde hem commen doen bescriven in tgroen camerkin byden scepenen huuse inden burg an Jacob vander Beckenne cleerc van weesen by namen ende toenamen waer zy wonnen ende wat neeringhe dat zy doen tusschen nu ende sinte Maertinsmesse naestcommende vp de boete daer toe staende zulc als hier naer volghen zal
2. Voort dat alle de ghone die landen hebben verstorven zynde van vader of moeder ende noch ter voochdie niet ghedaen en zyn dat vader of moeder dier noch leeft die kinderen ter voochdie doe ende jeghens hemlieden verdeele by vriendelichede daert goelicx zyn mach binnen xl daghen naestcommende ende daert also niet zyn en mach de voorseyde xl daghen overleden zynde dat de besittre of besittighe stappans daernaer ghehouden weerden clachtich te commene voor den voorseyden overzienre ende scepenen van weesen te dien hende dat zy daer inne voorzien moghen zodaer toe dienen ende behoren zal eeneglie dissimulatie ende de verdeelinghe con suis ofte andersins ghedaen zynde dat de voochden der voorseyde kindren goed overbringhen ten boucke van weesen binnen xxviij daghen daer naer eerst commende by goede verclaersen Ende als van den kinderen die verstorven zyn van vader ende moeder ende ter voochdie niet ghedaen en zyn dat de naeste vrienden ende maghen die ter voochdie doen binden voorseyden termyne of emmer binnen middelen tyden ter kennesse brenghen vanden voorseyden overzienre ende scepenen van weesen ten hende dat men die ter voochdie moghen doen ende daer inne voorzien zo hemlieden duncken zal oorboir ende prouffyt zynde
3. Voort dat alle de ghuene die alleenne voochden zyn van eeneghen weesen ende negheenen medevoocht en hebben dat die hemlieden voorzien van eenen medevoocht binnen eender maendt naestcommende of emmer dat bringhen ter kennesse van overzienre ende scepenen van weesen
4. Voort dat gheene voochden en houden eenich ghelt onder hemlieden der weesen toebehoorende daer zy voochden af zyn ofte weerden zullen maer dat bekeeren in den oorboir vanden kinderen binnen xl daghen ten lancxsten naer dat zy tzelve ghelt ontfaen zullen hebben Ende daert zo gheviele dat de voochden binnen xl daghen dat niet en vonden temployerne ende vut te ghevene dat zy ghehouden weerden zonder in eenegher manieren hemlieden daerinne te zoukenne stappans den voorseyden dach overleden synde dat te kennen te gheven den voorseyden overzienre ende scepenen van weesen
5. Voort dat de ghuene die binnen jaer ende daghe gheen rekeninghe ende bewys ghedaen en hebben vanden kinderen goede daer of dat zy voochden zyn dat zy daerof rekeninghe ende bewys doen voor den naesten vrienden ende maghen den zelven kinderen aennegaende ende tsloot van dien overbringhen den voorseyden overzienre ende scepenen van weesen omme dat byden clercq van weesen ten boucke ghestelt te zyne zoot behooren zal ten lancxsten tusschen dit ende Alder Heleghendach eerstcommende vp de peynne van vichtich ponden par den voochden te verbuerne in haerlieder persoon ende van hueren propren goede die van eeneghen van den voorseyden poynten in ghebreeke bevonden waeren ende bovendien ghecorrigiert te zyne ter discretie van scepenen
6. Voort waert by also dat voordan een besittere ofte besitteghe van een sterfhuuse daer weese ofte weesen inne gherecht zyn hem ofte haer betrocken ten state van uwelike heer hy ofte zoe met zulker weese ofte weesen by wette ofte by vriendelichede verdeelt stonden ende den zelven staet ten boucke ghebrocht dit zoude verbueren vichtich ponden par teen derde te ons gheduchts heeren ende prince waert tander derde te dezer zinder stede waert ende tderde ter vorseyder weese ofte weesen waert ende toote dien ghecorrigiert werden ter discretie van scepenen ten waere dat hy ofte zou alvooren den staet vanden voorseyden steerfhuuse in schaede ende baete ende dies den zelven sterfhuuse behoorden te volghene by eede ende by goede verclaerse toeghesloten overghebrocht hadden in den handen vanden overzienre ende scepenen van weesen
#...#
</main>
<end>
</end>