Compilatiecorpus Historisch Nederlands 1.0 (CHN): ambtelijke teksten 1250-1800: brugge_1497_1

<begin>
</begin>
<main>
Om dies wille dat binnen zekeren jaren herwaerts bevonden heift ende noch daghelycx bevynd dat eeneghe persoonen hemlieden vervoordert hebben beset boven beset te doene ende haerlieden parcheelen te belastene jeghen diverssche persoonen met losrenten lyfrenten of sommen van penninghen die men bevindt van te vooren in gheliken ghelast zinde also verzwighende de voorseide eerste lasten ende daer mede frauderende den coopers van den voorseiden renten ende ander die de voorseide besettinghe ontfanghen thuerlieder grooter scade ende achterdeele So eist dat min heeren van der wet omme daer inne te voorsiene gheordonneirt ende ghestatueirt hebben tnaervolghende te wetene
1. Eerst dat alle de ghuene die besettinghen van losrenten lyfrenten of verbanden van sommen van penninghen hebben vp eeneghe parcheelen binnen der stede ende scependomme van Brugghe ghestaen ende gheleghen ghehouden woorden de brieven van hueren voorseiden besettinghen ende verbanden of de copien autentycke van dien te bringhene ofte sendene inden handen van den clercken ende ten plaetsen hier naer ghenoomt te wetene de gheune daeraf de besettinghe ghestaen ende gheleghen syn in Sinte Janszestendeel ten contoire van Pieter van der Eecke ende Andries Croos deghuene in Sint Donaes zestendeel ter lade van meester Jan van den Leene ende Joos van Hulst in scepenhuus de ghuene in Onser Vrauwen zestendeel ten contoire van Jan Scoudharine ende Jan Smout de gheune in Sinte Jacops zestendeel ten contoire van Cornelis Bersier ende Roegier Bernaerds de ghuene in Sinte Niclaeus zestendeel ten contoire van Jan Moyaert ende Cornelis de Clerc de ghuene int sCaermers zestendeel ten contoire van Cornelis van den Leene ende Jacop van Oost alle clercken ter vorseider vierschare ende de ghuene daeraf de besettinghen gheleghen syn buten den poorten ende binden scependomme van deser stede ten contoire van Jan de Taye ende Jan de Corte an Sinte Baselis steeghere
De welcke ende elc sonderlinghe in syn zestendeel ghehouden word elke besettinghe te registereirne in eenen bouc ende register scrivende boven vpt hooft van elcken blade in grooten letteren de straten daer tselve beset gheleghen es ende vooren inden bouc spacie latende omme een tafele te makene van den voorseyden straten ende in wat blade men de selve besettinghen vinden sal Midts daerof nemende over huerlieder sallaris van scrivene van elcker besettinghe bedraghende twee ponden grooten tsiaers of der ondre ij grooten sonder meer ende van den ghuenen die boven den tween ponden grooten tsiaers iiij grooten van elcker besettinghe Ende van den besettinghen of verbanden van sommen van penninghen in avenante te wetene van elcker bedraghende xxxvj lib gr ende der ondre ij gr ende van den ghuenen diere boven ghaen iiij gr van den sticke ten ware dat den leghere van den parcheelen daer inne begrepen zeere groot ende lanc waren vanden welken zy in dat cas betaelt sullen syn in avenante van viij gr vanden sticke ende der ondere ende niet des boven
2. Item sullen ooc de selve clercken ghehouden syn te noteirne ende te scrivene alle de vpdrachten die duer de voorseyde letteren van verbanden ende besettinghe steken sullen metten date van dien mids daerof hebbende eenen groote van elcker vpdracht sonder meer
3. Item sullen de rentiers ghehouden wesen sulke neernstichede ende deligencie doen int overbringhen van den voorseyden besettinghen ende verbanden ende de voornomde clercken int scriven ende registreren van dien datte vuldaen sy binnen drien maenden nu eerstcommende ten lanxsten ende van den ghuenen die huerlieder originale brieven overbringhe sullen dat de voorseide clercken van den selven brieven so vele teenegadre niet over en nemen zy en mueghen ende de ghuene daeraf de besettinghen gheleghen syn buten den poorten ende binden scependomme die expedieren binden derden daghe naer dat hemlieden die overghebrocht woorden sonder de voorseyde brieven langher onder hemlieden te houdene vp daerof indien datter clachte of quame ghecorrigiert te sijne ter discrecie van scepenen
4. Item de voornomde drie maenden gheexpireirt synde so sullen de voornomde clercken inde zesse zestendeelen ghehouden woorden de voornomde boucken ende registren elc int syne over te bringhene int ghemeene college van scepenen ter camere die de selve boucken legghen sullen onder ende inden handen van eenen ghezworen clerc die hemlieden dincken sal nut ende ydonne daer toe zynde die alsdanne tlast hebben zal tghuent die voorseit es te continueirne ende alle de besettinghen ende verbanden die men van den daghe voordan passeren sal voor scepenen van Brugghe te scrivene ende te registereirne inden bouc vanden zestendeelen daert behoort daerof nemende sulken sallaris als vooren verclaerst staet sonder meer Laghen ooc de besette parcheelen in diversche zesten deelen zo zal men daerof verclaers doen ende scriven inden bouc van elken sesten deelen daert behoort Dies en sal de selve clerc die daerof tlast hebben sal selve gheene besettinghen moghen passeren maer zullen datte moghen doen alle andere ghezwooren clercken van der vierschaere die voor tpasseren van dien ghehouden worden by den boucke te commene ende te visiteirne offer eeneghe besetten van te vooren ghedaen of ghepasseirt syn ende welken bouc men ghehouden woort den selven clercke tooghene ende ooc allen anderen diet begheeren sullen tallen tyden als zyt van doene hebben
</main>
<end>
</end>