Compilatiecorpus Historisch Nederlands 1.0 (CHN): ambtelijke teksten 1250-1800: brugge_1500_1

<begin>
</begin>
<main>
Omme of te legghene alzulcke questien ende ghedijnghen als ghescepen waren te rysene tusschen buerchmeesters scepenen ende raedt vander stede van Brugghe of een zide Ende buerchmeesters ende scepenen vanden lande vanden Vryen of andere
Ter causen vandat de voorseyde van Brugghe hemlieden beduchten dat de voorseyde vanden Vryen onder tdexele van zekeren lettren van octroye by hemlieden onlancx vercreghen van mynen gheduchten heere zouden willen doen pointen alle manieren van poorters bedryf houdende int Vrye Twelke alzo verre alst angaet den poorters van Brugghe contraryeren zoude zekeren appointemente ende transactie daerof ghemaect int jaer LVIIJ verzouckende de voorseyde van Brugghe danof te ghebruuckene niet jeghenstaende ooc zekeren appointemente zichtent ghemaect by mynen heere van Nassau anegaende de contributie vanden voorseyden poorters van Brugghe omme zes jaeren tyts die onlancx gheexpireirt zyn
Ende de voorseyde vanden Vryen hemlieden beclaghende van dat de voorseyde van Brugghe diversche nyeuwe cueilloten ende onghelden ghestelt hadden vp tgoedt ende vitaille dat de vrylaten bringhen van buten binder stede te coope contrarye den appointemente ende transactie ghenaemt de zeventien pointen Verzouckende die ofghestelt thebbene
So waren ende zyn hendelic beede de voorseyde wetten van Brugghe ende vanden Vryen naer zekere communicatien by hemlieden hierynne tsamen ghehouden gheaccordeirt ende vereenst inder manieren hier naer verclaerst te wetene
Dat zy elcanderen gheconsenteirt ende belooft hebben consenteren ende beloven by desen van nu voordan te houdene ende te doen onderhoudene de voornoomde transactien ende appointementen vanden zeventien pointen ende vanden voorseyden jare lviij nopende der vryheden vander contribucie vanden inwonende poorters ende haghepoorters ghegoedt ende bedryf houdende int Vrye ende int appendanche ende elcanderen danof paysivelie te laten ghebruuckene also elc int zyne daerof voortyds ghebruuct heift naer den inhoudene vanden selven transactien ende appointementen ende den arresten ende sentencien daerof ghegheven zonder daer jeghens te commene noch te doene by eeneghen relievementen ottroyen vercreghen of te vercrighene nu noch in toecomenden tyden in eenegher manieren
Ende mids desen tvoorseyde appointement ghemaect by mynen heere van Nassau voor den tyt van zes jaren die al nv gheëxpireirt zyn ende de acte daerup ghexpediert ende alle questien ende processen daer ute gheresen extinct ende te nieuten Wel verstaende waert by alzo dat vp tverstant of usancie vanden voorseyden transactien ende appointementen eeneghe donkerhede quame of by eeneghe vanden supposten an deen of an dandere zyde ghedaen worde in frauden vanden selven transactien ende appointementen dat datte byden ghedeputeirden van beeden wetten by goeden verstande ende ghevouchsamichede verclaerst ofgheleit ende ghetermineirt sal worden Ende daer zy onderlinghe niet vereensen en consten zo zullen de voorseyden wetten ghesaemderhant kyesen twee of drie notable mannen die vp tvoorseyde gheschil partien hooren ende int vriendelicke appointieren ende vereensen sullen vp dat mueghelic zy of daer neen zo zal elc vanden selven partien vp zyn recht staen omme dat te vervolghene daer ende alzoot behooren zal Ende al zonder fraude
</main>
<end>
In kennessen van welken zaken zo zyn hierof ghemaect twee acten gheteekent by meesters Adriaen van den Berghe ende Joos Arends greffiers vanden voorseyden tween wetten danof elc van hemlieden eene onder hemlieden heift
Ghedaen den xxiijen dach van octobre int jaer Ons Heeren duust ende vyfhondert
Aldus onder gheteekent BERGHE ARENDS
</end>