Compilatiecorpus Historisch Nederlands 1.0 (CHN): ambtelijke teksten 1250-1800: brugge_1507_1

<begin>
</begin>
<main>
1. Voord omme dieswille dat de ordonnantien voortyts ghemaect vp tstic vanden weezen in diverschen articlen qualic onderhouden zyn so eist dat men ghebied ende beveilt dat alle de ghuene die voochden van weezen zyn ofte van nu voordanne werden midsgaders vrienden ende maghen van den zelven weezen maken ende ghaderen den staet van haren weezen ghoeden ten claersten dat zy connen ende moghen Ende dat alzo overbringhen by goeden verclaerse den overzienre ende scepenen van weezen wien de kennesse ende besorchsamicheijt van dien toebehoort Ende tote dien dat zy souffizanten zeker doen voor den overzienre ende scepenen van weezen vander handelinghe ende administratie die zy hebben ende nemen zullen van huerer voorseyde weezen catheylen ende ghereeden ghoede van welcken borchtucht te registreerne den clerc van weezen hebben zal voor zijnen sollaris vier grooten zonder meerf Behouden dat de voochden die tvoorseyde zeker niet en vermoghen ontstaen zullen mids tzelve ghereed ghoed te brynghene in handen van vppervoochden wel verstaende dat zy alle jare eens ghehouden worden rekeninghe ende bewys te doene voor vrienden ende maghen in zulcker manieren ende vp zulcken peynen als byder voorseyde ordonnantie daerof hanghende voor de nieucamere int scepenen huus breeder ghespecifieert staet de welcke ordonnantie men elcken beveilt in alle huere pointen ende articlen scerpelic tonderhoudene vp de verbuerte daertoe staende
2. Voord zo es gheordonneert ten faveure ende voordeele van weezen ten dien hende dat zy te bet vanden hueren bezorcht mueghen werden dat zoo wat voochden handelinghe ende administracie hebbende vanden ghoede van haerlieder weezen executeerlic zullen zyn in live ende ghoede ghelyc vreemden vanden ghebreken ende fauten diemen bevinden zal byden voorseyde voochden gheoorboort zynde inde administracie ende handelinghe van dien zonder hemlieden daerovre te moghen bewetteghen als poorters ende dat in dat cas de vryliede van heurlieder poorterscip hemlieden niet en zal moghen te bate commen
3. Voord dat de ghuene die voochden zyn van weezen verstorven zynde van vader ende moedre binnen jare ende daghe gheen rekeninghe noch bewys ghedaen vanden kyndren goedynghen daerof zy voochden zyn dat zy daerof rekeninghe ende bewys doen voor den naeste vrienden ende maghen den zelven kinderen aeneghaende ofte by ghebreke van vrienden ende maghen voor den overziendre ende scepenen van weezen Ende dat zy tslot van dien overbringhen omme dat by den clerc vanden weezen ten boucke ghestelt te zyne zoot behooren zal daer vooren hy hebben zal vier grooten zonder meer ten lancxsten tusschen dit ende Baefmesse nu eerstcommende vp de peine van twintich ponden parisise elcken voocht te verbuerne die daerof in ghebreke bevonden ware van zynen propren goede ende bovendien ghecorrigeert te zijne ter discretie van scepenen
</main>
<end>
</end>