Compilatiecorpus Historisch Nederlands 1.0 (CHN): ambtelijke teksten 1250-1800: brugge_1514_1

<begin>
</begin>
<main>
ORDONNANCIE VAN DEN PRYSIE
Omme oordene ende remedie te stellene in de groote ongheregheltede die men langhen jaeren ghehouden ende ghedaen heeft in de prysie van den lieder goedinghen in allen sterfhuusen ende anderssins binnen deser stede ghesien dat elc also wel vrauwen als mannen hem lettel daer an verstaende onderwonden hebben der lieder goedinghen te prysene ende sallaris daerof te nemene zonder dat zy daer toe eedt ghedaen hebben of byder wet gheauctoriseirt gheweest also men vseirt in allen andren vermaerde steden alsoot te bemoedene es dat meneghe persoonen zo wel wedewen ende weesen als andre zeere mesleedt ende bedroghen hebben gheweest
So es byden ghemeenen college van scepenen van Brugghe ghestatueirt ende openbaerlicken ter hallen ghecondicht metter clocke alvooren ghehadt ende vp taduys van den ghecommetteirde van der tresorye vpden xve dach van hoymaendt int jaer xve XIIIJ met deliberacie gheordonneirt
Dat van nu voordan het prysen vanden lieder goedinghen wesen sal een officie van vier persoonen die daer toe eedt doen zullen alsoot behoort ende dat inder manieren ende vp de condicien naervolghende te wetene
1. Eerst dat niemandt wie hy gheoorloven en sal binnen deser stede ende scependomme van Brugghe eeneghe catteylen te prysene in eenegher manieren dan de vier persoonen die daer toe byder wet ende in eede ontfanghen zyn te wetene Olevier van den Westhuuse Gregoeris van der Leene Gheleyn Kethele ende Pauwels Bufkin ende de ghuene die naer huerlieder oflivicheyt byder wet int zelve officie ontfanghen wesen zullen vp de boete van 1 lib par also wel te verbuerne byden ghonen diet prysde als diet dede prysen ende also dickent alst gheschiede de zelve boete gaende in drien te wetene teen derde ten proffyte van onsen gheduchten heere tander derde der stede ende tander derde ten proffyte van den voorseyde gheswoorne prysers
2. Item dat tvoorseyde office van den ghezwoorne prysers sal wesen een office vp hem zelven ende distinct van tofficie van den stochoudersscepe
3. Item dat de zelve ghezwoorne prysers hebben zullen voor hueren sallaris ende aerbeyt iiij gr van elcken ponde gr dat zy prysen zullen zonder meer
4. Item dat niemende in eeneghe sterfhuuse eeneghe cavelen maken sal moghen van eeneghen roerlicken goedinghen dan de voorseyde gheswoorne prysers vp de voorseyde boete van 1 lib par wel verstaende dat den bezitters ende aeldinghers wel gheoorloven sal int vriendelicke zelve huerlieder cavele te makene zonder begryp behouden dat zy niemendt vreimdeis daer over en nemen
5. Item dat tvoorseyde officie van den prysie hem niet bestrecken en sal vp eeneghe huusen renten landt boomen noch andre onroerlic goedt ten zy dat yemende dat begheerde
6. Item ne zal hem tzelve officie ooc niet bestrecken in zaken of ander officien der stede anegaende ghelyc van den yssue ende diere ghelycke ten zy ter begheerte van den tresoriers deser stede in welc gheval de voorseyde prysers ende niemendt el de voorseyde prysie doen zullen
7. Voordt dat omme alle prysien te doene ende vp den sallaris voorscreven zullen moeten altyde wesen twee prysers te gadre van den vieren ende niet min
8. Item dat scepenen themliedenwaerts behouden ende reserveren huerlieder auctoritheyt omme in toecommende tyden vpt voorseyde office zulcke kueren statuten ende ordonnancien te moghen makene ende stellene als hemlieden redelic dyncken sal voor den ghemeenen oorboir behouden indien men in toecommende tyden den sallaris van de voorseyde prysers minderde oft toflicie gheheel te nieuten dede dat zy in dat gheval dese stede ghehouden wort den coopers van tzelve officie daerof instandt te doene ende huerlieder verleyde pennynghen wederom te ghevene naer advenante van den gheheelen coope ende van den mynckinghe van den sallaris als nu gheordonneirt
9. Item indien dat yemende eeneghe prysie van goede niet en stonde zo zullen de voorseyde prysers ghehouden wesen de zelve prysie gheheel over te nemene ten zelven pryse dat zy datte ghepresen hebben ende dat betalen binnen zes weken daer naer mids daerof doende zekere vp dat ment begheert
10. Item dat men voor vppervoochden ter camere noch ooc ten weese papieren gheene prysie accepteren sal ten zy dat die gheteeckent zyn byden voorseyden ghezwoorne prysers ofte by den eenen van hemlieden ten minsten
</main>
<end>
</end>