Compilatiecorpus Historisch Nederlands 1.0 (CHN): ambtelijke teksten 1250-1800: brugge_1515_1

<begin>
</begin>
<main>
Compareren int college van scepenen van der stede van Brugghe Joos Schoudharync over myn heere den schouteeten midsgaeders mynen heere den burchmeestere vanden courpsse deser voorseyde stede met hem ghevought zeyde ende vertoochde inde presencie van meester Wouter Theeux aldaar by hemlieden betrocken hoedat naer den poorterlicken rechten ende den kueren deser stede elcken poorter der zelver stede verboden es eenen andren poortre voor andren wetten te betreckene ofte molesterene dan voor huerlieder rechten juge daer zylieden beede poorters zyn ende te rechte behooren in deerste instantie emmers zonder consent vanden heere ende der wet of ten ware van schult daerof dat de wettelichede gheschiet ware up persoonen buten den scependomme vander zelver stede wonachtich zynde ende dat vpde boete van vichtich ponden parisise Den welcken niet jeghenstaende de zelve meester Wouter Teeux die poorter was hadde onlancx leden binnen der prochie ofte eerlicheide van Arendonck ghedaen arresteren of bezetten zekere goedinghen aldaer gheleghen toebehoorende eenen Jan Colpaert ooc poortere ende alzo verbuert de voorseyde boete contenderende mids dien ten fyne dat hy byden voornomden collegie daerin ghecondempneirt zoude worden ende inde costen int cas van processe protesterende nietmin in huerlieder gheheel te blivene den zelven meester Wouter van andren mesusen in tyden ende wylen an te sprekene alzo zylieden in rade vynden zullen
Ende de voorseyde meester Wouter Theeus den voornomden heesch ende conclusien ghehoort hebbende verzocht die gheincereirt te worden in dacte vanden daghe ende dach omme daerop te connen andwoordene tachtaghen naestcommende daer jeghens de voorseyde Joos Schoudharinc inden name als boven sustineirde dat hy promptelick ten voornomden faicte behoorde te kennen oft loochenen ghemerct dat zyn selfs fait was Ende dezelve meester Wouter ter contrarien persisterende by zynen verzochten delaye verzouckende hier inde rechte
Al ghehoort tvoornomde collegie ghemerct dat de zelve meester Wouter Teeus van zyn selfs fait anghesproken was ordonneirde hem dat te kennen oft loochenen
Ende dat doende zeyde dat hy niet ignoreren en wilde hy en hadde binnen der prochie of eerlichede van Arendonc ghedaen bezetten tgoet vanden voornomden Jan Colpaert nemaer verzochte dach omme zyne exceptien te moghen proposeren die hem byden voornomden college gheconsenteirt was t viij daghen naestcommende
</main>
<end>
Actum xxj hoymaent anno voorseyt 1515
</end>