Compilatiecorpus Historisch Nederlands 1.0 (CHN): ambtelijke teksten 1250-1800: brugge_1527_1

<begin>
</begin>
<main>
1. Eerst dat in alle processen diemen van nu voordan instellen ende beghinnen zal tzy ter voorseyder vierschare of ter camere als de principale of originale heesschere niet en compareirt in persoone de procureur die voor hem occuperen ende agieren zal wort ghehouden procuratie te betoghene souffisant omme de zake te beghinnene ende voort te volghene tot den hende ende die procuratie of copie daerof auctentyck onder thanteeken vanden greffier met zynen heessche te exhibeirne ende int proces te latene ofte emmers ten minsten wort de principale heesschere ghehouden ter eersten dachvaerdt te compareirne in persoone ende alsdan ter presentie van scepenen te constitueirne eenen of meer procureurs omme die zake te vervolghene tot den hende daerof de greffier note houden ende een acte maken zal legghende die ooc in tproces
2. Item dat insghelycx de procureurs vanden betroken verweerers als huerlieder meesters in persoone niet en compareren zullen ghehouden worden procuratie te betooghene ende copie auctentyc daerof te latene int proces zo wanneer zy zullen willen andwoorden ofte dach daertoe begheeren ten ware dat de verweerere ter eerster dachvaert compareirde in persoone ende procuratie passeirde al zo hier vooren ghezeyt staet vanden heesschere
3. Item dat in alle zaken ende processen die al nu ter voorseyde camere of vierschare hanghe onghedecideirt de procureurs die daer inne occuperen alzo wel heesschende als verweerende ghehouden worden procuratie van huerlieder meesters te betooghene van oudder date dan tinstel vander zake ofte emmers ten minsten met ratificatie van alle voorgaende procedueren die te latene of copie daerof auctentyck onder thanteeken vanden greffier in tproces wel verstaende dat zo wanneer de principale heesschers ende verweerers zullen willen compareren telcker dachvaert in persoone in tzelve gheval gheen procuratie van nooden wordt Ende al eist dat zy zomtyts in persoone compareren zo en zal nochtans daerby niet verstaen zyn dat zy met huerlieder comparitie ende presentie de procuratie die zy van te vooren ghegheven hebben wederroupen ten ware dat zy datte by expresse verclaersden
4. Item ende zo wanneer eeneghe vanden taellieden of andre ghezworen clercken vander voorseyde vierschare zullen willen procederen zonder procuratie of anderssins dan byden voorseyde articlen gheordonneirt staet zo zal men hemlieden verclaersen daertoe niet ontfanghelic zynde ende bovendien comdempneren inden ypocras ter taxacie van scepenen
5. Wel verstaende daer yemende zal willen heesschen vut crachte van eeneghen obligatien sprekende ten prouffyte vanden brynghere sbriefs dat de ghonne die zulcke obligatie in handen heift ende tooghen zal vermach te agierene ende heesschene zonder procureur volghende doude costume ende styl in ghelycken onderhouden
6. Item omme dieswille dat eeneghe partien ende by speciale de verweerers als zy teenen poortersschen dynghedaghe betrocken zyn alle huerlieden ordinaire delayen nemen vp de antwoorde ende als de zelve delayen al ghepasseirt zyn zo doen zy huerlieden andwoorde bedynghen inde continuatie vander vierschare aldaer dat zy zomtyts de schult kennen ende verzoucken thebbene langhe daghen van paiementen Ende dat scepenen die de zelve continuatie houden gheen vonnessen noch appointementen gheven en moghen dan interlocutoire by den welcken vele ende diverssche heesschers an huerlieder schult niet gheraken en connen dan by lancheden van tyde by dat zy verbeyden moeten tot den eersten dynghedaghe twelcke zomtyts gheduert ij oft iij maenden tyts
7. Zo eist dat omme daerinne te remedierene gheordonneirt ende ghestatueirt es dat als de verweerere vp een continuatie dach kennen zal de gheheeschte schult schuldich zynde ende daghen van payementen verzoucken scepenen zittende ter zelver continuatie zullen zulcke partien renvoieren voor tghemeene college ter camere aldaer men de verweerere condempneren zal ende partien recht doen alzoot behooren zal naer de geleghenheyt vanden sticke

##

</main>
<end>
</end>