Compilatiecorpus Historisch Nederlands 1.0 (CHN): ambtelijke teksten 1250-1800: brugge_1527_2

<begin>
</begin>
<main>
Voort omme dieswille dat diversche jonghens beneden heurl jaren in protectie van vadre ende moedre ende in voochdien zynde hemlieden daghelycx stellen ten state van huwelicke jeghens den danc ende buten consente of wetene van heurlieder vadre ende moedre voochden vrienden ende maghen daer mede zy mainteneren ende sustineren huerlieder selfs ende ute voochdien zynde levende alzo voort in liberteyt ende zonder eenich bedwanc verdoende ende dissiperende al huerlieder goet thuerlieder eeuweghe verdervenesse ende ter grooter desolatie van huerlieder vadre moedre voochden ende andre vrienden ende maghen Zo eyst dat omme daerinne te voorziene ende provisie ghedaen te zyne by myne voorseyde heeren vander wet gheordonneirt ende ghestatueirt es Dat zo wat jonghman beneden den xxv jaren oudt ende in protexie van vadre ende moedre ofte in voochdien zynde hem van nu voordan stellen zal ten state van huwelicke jeghens den danc ofte zonder consent ende buten wetene van vadre ende moedre oft van huerlieder voochden vrienden ende maghen dat nietjeghenstaende tzelve huwelick zy nochtans inde protextie van vadre ende moedre ende ooc in voochdien bliven zullen ghelyc zy waeren daer te vooren tot anderstont dat zy met kennessen van zaken ute ghedaen worden zonder dat van huerlieder goedyghe eeneghe vercoopynghe alienatie of transport ghedaen zal moghen worden dan by consente ende auctorisatie vanden ghemeenen college van secpenen ter camere als oppervoochden van allen weesen onder hemlieden verweest
Ende waert dat yemende alzo ghehuwet zynde buten consente ende wetene van vadre moedre voochden vrienden ende maghen alzo voorseyt es eeneghe vercoopynghe ofte alienatie dede van eeneghe zyner goedynghen ofte ooc eeneghe schulden obligatien ende andre contraecten maecte zal al ghehouden zyn van nieuten ende van onweerden ghelyc of die niet ghebuert en ware
Daaerof dat men elcken adverteirt ten fyne dat hem elc wachte van scade
</main>
<end>
</end>