Compilatiecorpus Historisch Nederlands 1.0 (CHN): ambtelijke teksten 1250-1800: brugge_1538_1

<begin>
Men gheift ulieden te kennene hoe dat myn heeren vander wet ghemaect hebben zekere nieu ordonnantie diemen ulieden hier lesen sal
</begin>
<main>
Ute dien dat diversche persoonen binnen deser stede hemlieden daghelycx vervoorderen ende over langhen tyt vervoordert hebben de teeckenen ende bannieren van huerlieder huusen te veranderen daerbij dat de situacien ende leghers vanden huusynghen ende ooc de renten daerute gaende zeere verdonckert zyn ende noch meer worden zullen indiender niet inne voorzien en ware So eist dat omme daerinne te remedierene men scerpelic ghebiedt ende beveilt dat alle de ghonne die de teeckenen ende bannieren van heurlieder huusen binnen deser stede verandert hebben binnen twyntich jaeren haerwaerts dat zij de selve veranderde teeckenen weeren ende wegh doen ende weder uyt steken de oudde teeckenen daermede zulcke huusen gheteeckent waeren voor de voorseide xx jaren voort ooc dat van nu vordan nyemende wye hy zy hem en vervoordere eeneghe oudde teeckenen van zynen huusen te veranderen of laten veranderen maer dat elc houdde ende uutsteke zijn oudt ghecostumeirde teecken zulc alst was over xx jaeren tyts ende daer te vooren behouden dat men ten huysen daer noeynt teeckene hier te vooren uut en stac men daeruut zal moghen steken zulc een teeckene als den proprietaris ghelieven zal zonder dat ooc in toecommenden tyden te moghen veranderen dat ooc zulckc teeckenen als uteghesteken ende ghestelt zyn binnen xx jaren haerwaerts in huusen daer noynt te vooren teeckene ute stack zullen moghen bliven utestekende ooc zonder die te moeten veranderen al up de boete van x l p te verbeurene bij den ghonnen die hierof in ghebreke ware ende de contrarie van dien dade ende boven dien op teerste oudde teeckene weder ghestelt ende uteghesteken te wordene tzijnen coste behoudden dat elc hiertoe dach hebben zal omme die te vulcommene een maendt tyts ende zullen hierof hebben tbezouc ende kennesse dekenen ende deelmannen van deser stede
Voort dat alle de ghezworen clercken van deser stede van nu vortan in alle ghiften besettinghen verbanden of andere contracten die zy van nu vordan passeren zullen voor schepenen der zelver stede ghehoudden worden te stellene de namen ende toenamen vanden contractanten alzo wel vanden mans als vanden vrouwen ende de namen van den huusen daerof men ghifte geven bezettynghe of andere verbanden ende contracten passeren zal zulc als die gheteeckent ende ghenaemt zijn als zij teekenen ende namen hebben zullen met behoorlicke belegherthede van abauten canten ende zyden alzo men van oudden tyden ghecostumeirt ende schuldigh gheweist van doene upde boete van iij l parisis ende boven dien up arbitraire correctie ter discretie van schepenen
Voort dat van alle cedulen of andere wettelicke betooghen van eeneghe personele schulden daer de heesschere of crediteur zal hebben laten lyden drie jaren zonder zyn verschenen payement wettelick te heesschene ende daeromme betreck te doene in justicien men van nu vordan gheen namtissement wysen zal behouden dat de betrocken verweerere altyt ghehouden wordt de voorschreven cedule of andere wettelic betoogh ter eerster dachvaert te kennen of loochenen indien hy daertoe gedachvaert es op peyne van by ghebreke vandien of by zynder non comparitie de zelve cedulen of andere wettelicke betooghen ghehoudden te zyne overghekent naer doudde costume maer zal de zelve verweerder moghen nemen copie ende dach niet jeghenstaende de zelve kennesse omme tandwoordene alzo hy te rade wordt ende voorts procederen ghelyc offer gheen cedule noch wettelic betooch en ware
Voort dat men van nu voordan niet en zal moghen panden noch ooc chaerters van bezettynghen van eeneghen renten te wetten ghebieden van ouddere payementen verschenen dan van x jaren ende dat bij twee jaren teffens ende niet meer naer doudde costume ende indien yemende eenighe renten hebben of pretenderen wille op eenighe parcheelen binnen deser stede of schependomme van ouddere payementen dan van x jaren zal ghehouden worden zijn partye te doen dachvaerdene ter vierschare van deser stede ende aldaer concluderen bij zulcke redenen ende betooghen als hy zal connen vynden tsynder meenynghe dienende zyn ghepretendeirde rentegoet ghewyst thebbene alzo hy te rade vynden zal Ende dezelve rente goet ghewyst zynde zal dan moghen panden omme zijn ghevallen payementen te recouvrerene alzo hy te rade wordt

##

</main>
<end>
</end>