Compilatiecorpus Historisch Nederlands 1.0 (CHN): ambtelijke teksten 1250-1800: brugge_1572_1

<begin>
</begin>
<main>
Ghezien by scepenen van Brugghe tproces voor hemlieden gheresen ter vierschare tusschen Aernout de Wulf doude Jaspar Spoorman als ghetrauwet hebbende joncvrouwe Loyse de Wulf Jan Glande Fransoys ende Cornelis vander Mandere ende Jan de Vleeschauwere als ghetrauwet hebbende joncvrouwc Elizabeth vander Mandere Goossaert ende Vincent de Wulf Pieter Bibau metten hueren hoirs ende aeldinghers onder tbeneficie vande lettren van inventaris van heer Carel de Wulf in zynen levene presbitre heesschers ter eendere zyde ende meester Jacob vander Heyde ende Jan Willemyn als vooghden van Karel ende Magdaleene de bastaerde kynderen vanden voornoomden heer Karel de Wulf verweerders ter andere
Spruytende vuyt causen zo de voorseyde heesschers hadden ghedan zegghen ende vertooghen hoe dat notoir in rechte was dat bastaerde kynderen gheprocreeirt vuyt damnable conversacie niet met allen en mochten nemen noch ontfanghen van huerlieder vader nemaer gheheel versteken moeten wesen vanden goede vanden zelven huerlieder vadere dat hemlieden zoude willen gheven welck vigeur van ghescreven civilen rechte oock was conforme vanden canonycke rechten emmers dat zulcke ghiften niet en zouden moghen subsisteren dan tot effecte van simple ende competente alimentacie
Desen niet jeghenstaende hadde de voornoemde heer Karel de Wulf hem vervoordert te gheven ende transporteren de voornoomde zyne bastaerden ghewonnen binnen zynen priesterlicken staet alle ende eenyeghelicke zyne goedynghen leenen meuble ende actien bedraghende tot groote excessive ende notable somme naer tverclaers ende inhouden vande copye auctentycque vande zelve vpdracht onder de signature van Jan Panckoucke ghezworen clercq ter vierschare der voornoomde stede de zelve vpdracht ghepasseert hebbende hebbende de zelve heer Karel donateur alleenlick buitten vpdrachte ghelaten ten zelven sterfhuuse ontrent zessendertich ghemeten cheynslandt onder de roede van Thielt hebbende die te vooren belast met acht ponden grooten siaers losrente den pennynck zestiene latende daer jeghens tzynen sterfhuuse ende zonder last vande voornoomde beghifte groote menichte van passivele schulden boven de testamenten ende funerailen verre excederende de weerde vanden voornoomden achterghelaten lande hebbende nochtans de zelve heer Karel in zynen levene ghedeelt ende gheproffiteirt van zyne ouders vrienden ende maghen vele notable partyen van goedinghen zo in erfve renten als andersins dewelcke hy vercocht ghealieneert ende belast hadde alsboven studerende by middele vande voornoomde ghiften ende vpdrachten dese heesschers zyne gherechteghe hoirs ende aeldynghers daerof tontvrimdene ende ontmakene Midswelcken de voornoomde heesschers concluderende tendeerden ten fyne dat by vonnesse ende over recht ghewyst ende verclaerst zoude zyn dat zy hemlieden met goeder causen becroont ende beclaecht hadden vande verweerers inde qualiteyt zo zy betrocken waren zouden dien volghende alle de voornoomde ghiften cessien ende transporten byden voorschreven wylen heer Karel de Wulf ghedaen ten behouve vande voornoomde zyne bastaerde kynderen verclaerst wesen nul ende van onweerden met al diesser naer ghevolcht was ende overzulcx alle tzelve ghecasseirt ende te nieuten ghedaen zouden worden Voorts de zelve verweerers ghecondemneirt zyn alle de cessien ghiften ende transporten met al diesser naerghevolcht was in wat manieren dat het zelve ware te laten varen ende dies zy daerof gheproffyteirt hadden te restitueren ende laten volghen dese heeschers als haerlieder eeghen ghesuccedeirt goedt daerof doende rekennynghe bewys ende reliqua emmers ten minsten midts byden heeschers ghevende ende betalende ten proffyte vande zelve bastaerde kynderen voor elcken een lyfrente van vyf ponden grooten tsiaers heesschende voorts costen scaden ende interesten by sverweerers oppositie ghedoocht ende staende te ghedooghen of vuyterlick etc
Daerjeghens de voorseyde verweerers deden zegghen ende vertooghen by andtwoirde hoe tmajeur van rechte byden heesschers gheproponeirt ter materie subiecte impertinent te wesen ghenomen tzelve maieur zo ample te nemen ende te verstaene ware als dheesschers beliefde tzelve te trecken Eerst vuyt causen dat notoir was in rechte dat de ghuene die gheboren es van een moeder onghehuwet ende de vader in huwelicke state zynde en wert met verstaen gheboren te zyne ex damnato coitu zulcx dat hy zoude wesen subiect de peyne byden rechte ghestatueirt in teecken van dies was warachtich dat zulcke kynderen gheprocreeirt van priesters ende onghehude vrauwe van allen ouden tyden zo binder voornoomde stede van Brugghe als andere steden ghesuccedeirt hadden inde goedinghen van huerlieder moedere twelcke nochtans niet en zoude gheschiet wesen indien zulcke kynderen ghehouden hadden gheweest ende waren ex damnato coitu gheboren te zyne ende subiect de dispositie van rechte nemaer hebben zulcke gheprocreerde altyts ghehouden gheweist voor simple bastaerden Ten anderen al eyst zo dat naer rechte een aventronck niet en mach hebben testament nochtans es capable om thebben ghiften tusschen den levende Ende alzo naer dien de voornoomde verweerers weesen niet en consten ghehouden wesen nochte gherekent voor aventroncken of gheboren ex damnato coitu noch oock beghift en waren by testamente vanden voornoomden heer Kaerle nemaer alleenelick by ghifte ofte donacie tusschen levende ende metter warmer handt zo dheesschers zelve poseerden ende betoochden by huerlieder overlech
Byden welcken volchde dheesschers in huerlieder ghenomen fynen ende conclusien niet ghefondeirt te zyne nemaer dat de voornoomde donacien byden voornoomden heer Kaerle wesende een simpel priester ghedaen de voornoomde zyne kynderen waren schuldich te subsisteren ende haer effect te sorteren zonderlinghe ghemerct dat hy byde zelve donacien de voornoomde kynderen anders gheene goedynghen ghegheven dan die hy zelve ghewonnen ende gheconquesteirt hadde Ende indien de voornoomde heer Kaerle in zyn levene eeneghe partyen van goedinghen ghedeelt hadde van zyne vaders twelcke de verweerers ignoreren ende consequentelick ontkenden en ghynck tzelve hemlieden niet anne midts dat de zelve heer Kaerle met de zelve pretense ghedeelde goedinghen zyne wille ghedaen ende die verdaen in zyn jonckheyt ghenouch wesende voor de verweerers dat de ghegheven ende ghetransporteirde goedinghen niet en waren vande zelve ghedeelde goedinghen nemaer gheconquesteerde Daertoe ghevoucht dat claer ende notoir was dat de supposten vande cathedrale kerke van Saint-Donaes binder voornoomde stede van Brugghe zo als was de voornoomde heer Kaerle hadden recht ende waren in possessie van allen ouden tyden van vryelick ende liberlick te disponerene van huerlieder temporelle goedinghen in zulcke vorme ende manieren tzy by testamente ofte donacien tusschen levende byder doodt ofte andersins ende ten behouve van zulcke persoonen zo wel huerlieder natuerlicke ende bastaerde kynderen als andere als hemlieden beliefde niet jeghenstaende eeneghe rechten wetten ofte costumen ter contrarien
Midswelcken de verweerers namen conclusie van niet ontfanghelick quade cause quycte zouden dienvolghende de ghequereleirde donacien sorteren huerlieder effect ende dheesschers ghecondemneirt wesen by conclusie renversaire de voornoomde kynderen daerof te laten ghebruucken ende possesseren als van huerlieder vry propre ghegheven goedinghen met heesch van costen scaden ende interesten
Dheesschers by replycque ende de verweerders by duplycque ende de redenen daerinne begrepen elck van hemlieden persisterende byden hueren
Ghezien de preuven ende informacien byde voornoomde partyen aen beede zyden naer admissie ghedaen de reprochen ende salvacien daerjeghens ghedient metter acte van conclusie in rechte ende gheconsidereirt al dat in dese zake diende gheconsidereirt te zyne met deliberatie van raden So was hendelynghe by vonnesse van scepenen ter manynghe vanden heere gheseyt ghewyst ende verclaerst dat de ghiften van huusen leenen ende renten in questie zo verre die by den overleden heer Kaerle de Wulf ghecocht zyn gheweest effect sorteren zouden omme by sverweerers weesen beghifte daerof te ghenieten ende ghebruucken huerlieder leven lanck gheduerende alleenlick ende niet langher condemnerende de heesschers die zo langhe te laten bezittene ende het jaerlicx proffyct ende incommen van dien te lichtene verclaersende hemlieden tot de zelve ghiften voordere of anders te zyne niet ontfanghelick Ten surpluse nopende de catheylen meuble actien ende schulden in questien verclaersden de ghiften van dien schuldich zynde te sorteren effect zo die ghedaen zyn gheweest dien volghende de voorseyde heesschers dien aengaende thueren fynen ende conclusien te zyne niet ontfanghlick Absolverende daerof de verweerders ende compenserende de costen van den processe om redenen scepenen daertoe moverende
</main>
<end>
Actum den thiensten dach van hoymaent int jaer xv tweenzeventich
</end>