Compilatiecorpus Historisch Nederlands 1.0 (CHN): ambtelijke teksten 1250-1800: brugge_1579_1

<begin>
</begin>
<main>
Omme te verhoeden het groot bedroch fraude ende ongheval twelcke daeghelicx lancx zo meer gheschiet ende bedreven wordt int vercoopen ende belasten vande huusen ende landen binnen deser stede scependomme ende vryhede van diere gheleghen by het verzwygen ende ignoreren van voorgaende renten schulden belastynghen ende verpandynghen twelcke zonderlynghe gheschiet duer dien dat de persoonen huerlieder huusen of landen vercoopende veranderende of belastende te wercke stellen diveersche clercken deene vanden anderen niet wetende Ende ten hende voortan elck mach zekerlick weten wie de zelve huusen ende landen binnen deser stede scependomme ende vryheden van diere toebehooren metgaeders de lasten van renten ende andere daerop staende zo zyn byden heere ende wet deser stede gheordonneert ende ghestatueert voor een eeuwich edict de poincten ende articlen naervolgende
Eerst zo wanneer eenich huus meulene erve ofte landt ghestaen ofte gheleghen binnen der stede scependomme ende vryhede van diere voortan vercocht verlandt vermanghelt ghegheven of anderssins opghedreghen of verandert zal worden of belast met eenigherande renten loopende ende afgaende schulden servituten reele of personele of wat andere lasten ende tot wat tytle dat zy de clercken vander vierschaere zulcke vercoopynghen ghiften verlandynghen manghelynghen opdrachten of belastynghen voor scepenen ghepasseert hebbende 1 worden ghehouden der anderstont daerof eenighe brieven vut te ghevene de zelve huere passerynghen aen te draeghene Mr Nicolaes van de Woestyne als by den collegie van scepenen daertoe ghestelt ende ghecommitteert zynde omme by den zelven Mr Nicolaes vander Woestyne tot effecte vande zelve vercoopynghe ende bewaernesse van elcx recht ghenoteert ende opgheteekent te wordene inde registers by hem daertoe ghemaect of te maeckene ende tot betooghe ende ghetughenesse dat zulckx ghedaen zy de brieven daertoe dienende by hem gheteeckent te wordene up den ploy met zyn handteecken zonder nochtans by den zelven clercken de lieden meerder loon of salaris te moghen heesschen dan men van oudts schuldich ende ghecostumeirt es gheweest te betalene ende dat up peine van by de clercken dies in ghebreke zynde te verbuerene voor deerste reyse x l par een derde tot profyte vanden ghecommitteerde voor de tweede reyse van opghehouden ende ghesuspendeert te zyne van texercitie van huere officien den tyt van eenen jaere ende voor de derde reyse op peine van verdreghen ende afghestelt te wordene vande zelve huere officien ende clercscepen ende boven dien te betalene partye telcker reise haer interest
Tot welcken hende zal de voornoemde ghecommitteerde maecken ende houden claere ende bescheedighe registers van alle de huusen muelens landen ende andere onroerende goeden binnen de voornoemde zes zestendeelen metgaeders de paele ende vryhede der stede gheleghen omme alle vercoopynghen manghelynghen veranderynghen belastynghen vpdrachten affectatien ende bezwaerynghen van de zelve huusen muelens landen ende andere onroerende goeden vute wettelycke brieven daeraf ghemaect daeryn te teeckenen noteerende by goeden verclaerste de ghealieneerde huusen muelens erven ende landen metgaeders de gheypothequierde renten schulden servituuten ofte andere reele actien ende lasten metten jaere ende daete vander scepenen kennesse ende passerynghe metgaeders de naemen ende toenamen zo wel vande guene de zelve vercoopynghen vpdrachten alienatien belastynghen ende affectatien ghedaen hebbende als van de gone tot wiens profyte die ghedaen zullen wesen mette namen van scepenen ende clercken daerover ghestaen hebbende
Daervooren men schuldich wordt den zelven ghecommitteerde te betalene Te wetene voor het teeckenen van elcke vercoopynghe manghelynghe verlandynghe ghifte ofte andere alienatie belastynghe vpdrachten ofte affectatien metgaeders ooc voor het teeckenen van alle ontlastynghen van renten ende andere lasten ende bezwaeringhen vier groote Ende voor tzoucken van dien zo dicmael hy daertoe van weghen de goede lieden verzocht zal worden twee grooten ten waere zy begheerden daervut extraict ghemaeckt te wordene daervooren men zal betalen vier grooten zoo hy de guene dies thuerlieder instructie ende gherusticheyt ende voor huerlieder interrest van doene hebbende ghehouden wordt daer in te gherievene ende ooc anderssins de lieden in als te doene goede ghereetschap ende tot dien hende hem daegelicx ten comptoire daertoe gheordonneert voor ende naer de noene zekeren bequaemen tyt te houdene
Verclaersende ende statuerende expresselick dat alle vercoopynghen verlandynghen manghelynghen ghiften ende andere alienatien met gaeders alle belastynghen vpdrachten transporten ende affectatien hoedanich die hy ende tot wat tytle die ghebuuren moghen van nu voordan voor scepenen te gheschiedene van gheender weerde cracht macht noch effecte en zullen wesen jeghens of tot prejudicie van andere dan de guene die ghedaen ende verkent hebbende tot anderstont die ten voorseyden registeren gheregistreert ende de brieven daeraf ghemaect zynde by den voornoemden ghecommitteerde gheteeckent of ghemarcquiert zullen wesen de guene ten zelven registeren eerst bekent ghemaect ende ghemarcquiert zynde al waeren die ooc jongher van daete vooren gaende wel verstaende alsser twee ofte meer commen zullen tsaemen ende op eenen tyt ghepasseert voor een ofte meer clercken dat die oudste ende eerst voor scepenen verkent gheweest zynde zal ghestelt ende gheregistreerd worden voor den joncxten ende dat niet jeghenstaende alle costume ter contrarien ende de zelve doende te nieuten by desen ordonnerende eenyeghelick hem daer naer te reghelen upde peinen voorscreven
</main>
<end>
</end>