Compilatiecorpus Historisch Nederlands 1.0 (CHN): ambtelijke teksten 1250-1800: brugge_1580_1

<begin>
</begin>
<main>
Men gheift ulieden te kennen dat burchmeesters scepenen ende raeden der stede van Brugghe bevonden hebbende vele noodeloose solemniteyten tot noch toe onderhouden inde pandynghe ende andere procedueren dienende ter vierschaere ende begheerende jeghens de zelve ende andere incommoditeyten te voorsiene tot beter expeditie van justicie ende gheriefsamicheyt van partyen hebben gheordonneert de poincten naer volghende naer de welcke eenyeghelick hem voordan zal hebben te reguleren vp peine van te zyne van onweerden alle proceduren die contrarie dese ordonnantie ghedaen ende beleet zullen worden
Eerst zal de solemnyteyt van ryden ter pandynghe achterghelaten worden ende in stede van dien zal mynheer de schoutheet met twee scepenen ende de greffier vander vierschaere sdaeghs naer elcken dynghendach tzy poorterssche ofte van twiste ten tien hueren voor noene zitten inde vierschaere alwaer de clercquen voor hemlieden zullen moghen overgheven alle zuleke parcheelen als zy zullen willen ghepandt hebben
Welcke pandynghen de zelve clercken elc int zyne ghehouden zullen wesen binnen de achte daeghen daernaer eerstcommende te insinuerenede proprietarissen wyens parcheelen ghepandt zullen zyn gheweist indien zy in stede wuenen daer een ander bewuedere vande zelve parcheelen ende met eenen hemlieden te kennen gheven dat de zelve pandynghen ten eersten dynghedaeghe daernaer te wette gheboden zullen worden hemlieden met eenen de wete doende wanneer men den zelven dynghedach houden zal
Ende tot broeder ghereetscepe van partye zalmen voortan mueghen telcken dynghedaeghe panden indistinctelick alle huusen ende parcheelen in wat sestendeelen die ghestaen ende gheleghen zyn ende zo buten als binnen midsgaeders ooc de persoonen waer de zelve wonachtich zyn
zal men ooc mueghen panden teender reise voor alle de verachterthede van renten huushueren ende loopende schulden staende te betalene by payementen van also vele jaeren als die verachtert zyn wel verstaende onder de thien jaeren ende niet daer boven ende behoudens dat tlaetste van dien verschenen zy een alf jaer te vooren
Item midts dat de dynghedaeghen zo onghedeelt zyn ende verre van elcanderen tot grooten intereste van partye zal van nu voordan alle maende ghehouden werden eenen dynghedach te wetene eerst de eene maendt telcken eersten woensdaeghe ende donderdaeghe van diere oftre een dach ofte twee te vooren indient heylichdach werdt eenen poortersschen dynghedach ende de andere subsequente maendt telcken eersten donderdaeghe ofte sdaegs te vooren in cas als vooren van twiste ende alzo van maende te maende naervolghende by toure
Ende zullen vpden dynghedach van twiste svoornoens ooc mueghen inneghestelt werden provisionele zaecken ende bedynct decreten zo verre datter eeneghe vallen ende ghelesen arresten ende pandynghen
Item en zal men ooc voortan niet ryden voor de dynghedaeghen omme dachvaerdynghen te doene nemaer zullen de zelve in civile zaecken ghedaen worden by den clercq vanden greffier vande vierschare ende om den twisten byden amman ofte clerq vande schoutheeten respectivelick werdende nietmin ter deure vanden scepenhuuse sdaeghs voor den dynghedach ghelesen de rolle vande ghedaechde partyen achtervolghende de costume dies van oudts onderhouden
Voorts midts datmen tot grooten achterdeele van partye ghewone es gheweest naer sentencie ghegeven vp voortghangen van arresten ende pandynghen te verbeidene de ghenachten van twyntich daeghen ghelyck offer gheene opposicie ghevallen en hadde zo ordonneert men dat alsser eeneghe oppositie valt jeghens arresten of pandynghen ende datter voortganck ghewesen werdt tzy by provisie ofte ter diffinitive datmen terstont naer tzelve ghewysde zal daermede voortgaen zonder te verbeidene de voornoomde ghenachte
Hendelynghe zo wanneer eenighe huusrumynghe ghewesen zal worden ter vierschaere tzy ten principalen ofte ter provisien wert myn heere de schoutheeten ofte den eersten officier daertoe verzocht zynde ghehouden vanden zelven ghewysde insinuatie te doene den zelven bewuenders ende ghebieden de zelve huusrumynghen te doene binnen zeven daeghen Vp peine van tenden dien zyne catheilen ende huusraet daer vute ghestelt te wordene
</main>
<end>
</end>