Compilatiecorpus Historisch Nederlands 1.0 (CHN): ambtelijke teksten 1250-1800: brugge_1616_1

<begin>
</begin>
<main>
Vp het vertooch ghedaen aen haer doorluchtichste onse souveraine princen in huerlieder secreten raede van weghen de voochden vande vanghenesse der stede van Brugghe inhoudende etc haere hoocheden de saecken voorseyt gheconsidereert ende daerop ghehadt het advys vanden president ende luyden van onsen provinciaelen raede in Vlaenderen daerop ghehoort den hooch bailliu burchmeesters schepenen ende raeden der voorseyde stede van Brugghe gheneghen wesende te favoriseren de godtvruchtighe intentie vande voornoemde voochden supplianten hebben gheordonneert ende ghedecreteert ordonneren ende decreteren by desen dat alle ghevanghenen die in toecommende tyden ter voorseyde vanghenesse zullen bevolen werden voor eenighe civile schult ofte actie aldaer zullen alleenelick ghenouriert werden vpde voorseyde fundatien ende aelmoessen hiervooren gheroert den tyt van eender maendt innegaende ten eersten daeghe van huerlieder incompste ter zelver vanghenesse Ten expireren van welken tyt de crediteuren die de zelve persoonen aldaer zullen gherecommandeert hebben ghehouden zullen zyn anden cepier te verandtwoorden voor huerlieder costen ten advenante van twee stuvers en halven sdaechs by faulte van welcken zal den voorseyden cepier gheoorloft wesen de voornoemde ghevanghenen te relaxeren naer éene sommatie die hy ghehouden wert te doene ande voorseyde crediteuren zonder dat zy vermoghen zullen hemlieden te bevelen ter voorseyde vanghenesse voor de selve schult zonder alvooren betaelt t' hebben de voorseyde costen ter voorseyde pryse vanden daghe van huerlieder incompste ende lastynghen ordonnerende etc
</begin>
<main>
</end>