Compilatiecorpus Historisch Nederlands 1.0 (CHN): ambtelijke teksten 1250-1800: brussel_1287_1

<begin>
De schepene van laken mir vrouwen van den vorde ende al der heren Die doen cont al den genen die dese lettren selen lesen horen ofte sien ochte die sijn ofte selen sijn
</begin>
<main>
Dat quaem gosen de starke ende vercochte joncfrouwen katelinen van watermael x s chens jarleks ten huse boef van watermael dat in den wingart van brusele steet ende die altoes te geldenne te kerssavonde alse selkes gelds alse in borse loept gemeinleke op en hofstaet die gelegen es in weelinsciep ende die men hout van clause die sone waes mins here ser liedekens Ende de vorgesegede gousen dede der vor geseder kathelinen tote dien vornountden x s ende te vornomder hofstat alse verre alse de weet wijsde Ende al soe war dat sake dat de vornonde gousuwen der vorseider joncfrouwen katelinen niet en golde den vornounden chens te vorghenomde dagh soe mochte de dicke vorseide kateline har hant sclaen ane de vorseide hofstaet sonder enech wedersechen ende houdense tote dien male dat sie hadde haren chens die voer genont es wel vergouden
</main>
<end>
Ende omme dat wi willen dat dit si vaste dinc ende gestade ende wel gehouden soe hebbe wit die voer genomt sin scepenen geseghelt met onsen gemenen seghele Ende dit was gemakt ende gedaen int jaer ons heren m cc lxxxx ende vij jn sente pauwels daghe
</end>