Compilatiecorpus Historisch Nederlands 1.0 (CHN): ambtelijke teksten 1250-1800: brussel_1294_1

<begin>
met concente der Capittelen Dat si cont alle den ghenen die dese letteren seelen sien ochte horen
</begin>
<main>
dat de meestersse ende dcouent van den gasthuse van sente gudilen met concente der capittelen van sente gudilen diere prouiseere ende hoedere aue sijn hebben ghegeuen vranken die men heet rodinc eene hofstat metten huse die gheleghen es opten hoerrec naast tser anecoys die men heet van achter gasthus op eenen jaerliken tseens van vj lb te gheuene altoes te kerssauonde embermeer ende erflec ende euwelec alse sulc gelt alse in borsen geet ende gaen sal te dien tijde alse ment gelden moet
</main>
<end>
Ende ombe dat vast ende ghestaedech si ende bliue so hebbe wij dit geseegelt met ons couents seeghele Ende bidden her janne Cantere ende her arnoude Tresorijr ende her janne van bijrbeke ende her willeme van selleke Canoneke van sente gudilen dat si hare seeghele metten onsen hanghen aene desen Brief in orkenscap der warheit alse prouisores diere ouer waren Ende wij jan Cantere Ende arnout Tresorijr ende jan van bijrbeke ende willem van selleke Canoneke van sente gudilen want wij ouer dese voregenuempde vorewarde waren endet met ons ghedaen was so hebbe wij onse seeghele met des voreghenuemps conuents seeghele ghehanghen in orkenscap der warheit ane desen Brief Dit was ghedaen jnt jaer ons heren alse men Screef M CC xcix tsaeterdaegh na sente pauwels dach
</end>