Compilatiecorpus Historisch Nederlands 1.0 (CHN): ambtelijke teksten 1250-1800: brussel_1312_1

<begin>
Alle denghenen die dese lettren zelen sien ochte horen lesen Gisebrecht [Tampe] Ende gheerem vten nuwen huys scepenen van brussele salut ende kennisse der waerheit wij doen cont
</begin>
<main>
dat vore ons sin comen arnout de Coninc godeuert van Mons jacob van Mons sin kinder her willem de coninc seghere die men heet soy Ende gheerem sinen brudere arnout delen sone wilen was heinrex leuws woutere Ende arnout ghebrudere sonen wilen waren wouters leuws also maghe jans vander porten wilen was van sire Moeder weghen die welke vervinghen alle hare partie die daer niet en was jn deen side Ende ghisebrecht lenken henrec [clitonc] willem sin bruder jan vander sennen die men heet hasen oghe heinrec vroude arnout sin bruder ende jan lymeer alse maghe jans vander porten vorghenomt van sins vader weghen die oec vervinghen alle hare partie die daer niet en was in dander side Ende heeft deene partie dandre quite ghescouden gheliic dat hirna bescreuen es Dat es teuerstane dat devorghenomde Maghe vander Moeder weghen hebben quite ghescouden devorghenomde Maghe vans Vader weghen van alle den Rechte dat sij hadden in een huys Ende jnde hofstad daer wilen jan vander porten vorghenomt jn woende gheleghen tusschen willem tays ende hughes van Coudenberghe die wilen was Ende oec van allen den Rechte dat sij hadden jn drie dachwant lans die telaken gheleghen sin Ende van alle diere erfelecheit die des vader Maghe houdende sin van jans weghen vander porten vorghenomt Ende oec van alle dien dat der Moeder Maghe eisschende waren des vader Maghen tote opten dach dat dese lettren ghemaect waren Ende behoudenlike dien Dat des vader maghe vorghenomt zelen besetten viif pont tsiars erfelike der Capittelen van sente goedelen ter Campelrien behoef Vort es tewetenne dat devorghenomde Maghe van des vader weghen hebben quite ghescouden devorghenomde Maghe vander Moeder weghen van alle den Rechte dat sij hadden jn een huys Metten gronde gheleghen bij sente godelen Dat wilen was ser arnouts dien men hiet lombart wilen Tresorier inde kerke van sente godelen Ende van alle der erfelecheit die der Moeder Maghe jans van der porten vorghenomt van jans weghen houdende sin Ende van alle dien dat sij hen noit eisschende ware tote opten dach dat dese lettren ghemaect waren Ende behoudenleke oec dien dat der Moeder Maghe vorghenomt zelen besetten Tien pont tsiars erfelike der Capitelen van sente godelen ter Campelrien behoef die vorghenomt es Ende hirmede sin devorghenomde Maghe vander Moeder weghen alle jn deen side Ende de Maghe van des vader weghen jans vander porten vorghenomt alle jn dander side besceden ghesaet Ende gheaccordeert van desen goede vorghenomt Ende van alle den tviste onbescedenheiden ende die tusschen hen gheweest heeft vanden tide die leden es tote opten dach van heden Ende heeft deen opten andren verworpen ende verteghen na Recht ende vsagen vander stad van brussele Behouden dien waer dat sake dat enech goet hirvordane vanden worde daer men tevoren niet aue en wiste dat men dat deilen zoude ghelijc datment sculdech ware tedeilne nader stad Recht van brussele
</main>
<end>
jn dewelke orkenscap wij devorghenomde scepenen bij beden vanden partien onse zeghele an dede lettren hebben ghehanghen Dat was ghedaen jnden jaren ons heren doe men screef Dusentech drie hondert ende tvaleue des zaterdaghes na Chinxendach
</end>