Compilatiecorpus Historisch Nederlands 1.0 (CHN): ambtelijke teksten 1250-1800: brussel_1314_1

<begin>
Cont Si allen
</begin>
<main>
dat lisebet van stercbeke heeft ghegheuen binnen haren Ghesonden liue ende bewijst met wetteleker vertienessen haren dochteren dats te verstane lisbetten ende wouteren godeuaert sone was van orssendale haren man ende haren mombore ende agneesen ende lodewike coevoet haren man ende Mombore de woninghe also alsi gheleghen es ande waermoesporte metten husen ende met al dat daer toe behort De welke woninghe de vorgheseide ghesustere met haren Mannen ende Momboren vorghenoemt wettelec ende met eendrechtecheiden ghedeilt hebben Met Meeringhen ghelijc datter ghemeert ende ghepaelt es na der stat zede van brussele jnder Manieren die hier naer bescreuen staet Dat es te verstaene dat de helft vander woninghen ter straten waert ende dat daer toe hoert es gheuallen jn deele der vorgheseider lisebetten ende wouteren haren man ende dander helft van dier woninghen achterwaert met al dat daer toe hoert es gheuallen jn deele der vorgheseider agneesen ende lodewike haren man ende al na dat de meer die woninghe tuschen vore ende achter bescheedt ghelijc dat wettelec ghemeert ende ghepaelt es Ende es te verstane dat de vorgheseide lodewijc sal moghen maken op dat hem ghenoechlec es ende hi wille vanden enen Meere ten andren also verre alst bemeert es opt sine eist thun ochte glent welc hi wille Ende de vorgheseiden woutre sal moghen maken op dat hem ghenoeght ende hi wille vortane toter straten opt sine also verre alst ghemeert es eist thun ochte glent welc hi wille na dat de meer bewist Ende in Manieren dat de vorgheseide agneese ende lodewijc hare man ende hare ghesinne selen haren wech hebben op lisbetten ende wouters deel van Sesse voeten wijt ter vordster porten ende ter straten waert vte te gaene ter welker porten de vorghenoemde lisbette ende agnees ende hare manne ende Momboren vorghenoemt hare slotele alleens hebben selen ende de vorgheseide lisebeth ende woutre hare man ende hare ghesinde selen hebben haren wech achterwaert ten borne putte ghelijc lodewike ende ghelijc dat de wech nu gheleghen es dats te verstane tuschen der cameren ende der Cokenen achter viere voete wijt drie dwerse vinghere Min Ende beide de vorghenoemde partien selen altoes vortane den borne houden op haren ghemeinen cost het en waere ocht die borne eneghe faute ochte eneghe Crenkenesse hadde van lodewijcs weghen dat openbare ware dat dat die lodewijc beteren soude Vort en sal engheen van beiden den vorgheseiden partien temmeren vorder dan tuschen hem ghemeert es noch en sal also moghen temmeren engheen van beide den partien dat doen den andren siin licht benemen moghe Hir ouer waren alse scepenen van brussele her gherem ser hemcards ende her reynere Egloy die hare seghele hebben ghehanghen an dese lettren
</main>
<end>
jn kennessen der waerheit van allen den vorgheseiden dinghen Dese letteren waren ghemaect ende ghegheuen jnt jaer ons heren alse men screef M ccc dertiene sdisendaghs vor onser vrouwen lichtmesse
</end>