Compilatiecorpus Historisch Nederlands 1.0 (CHN): ambtelijke teksten 1250-1800: brussel_1318_1

<begin>
Alle den ghenen die dese lettren zelen zien ende horen lesen wij heinrec de bursere ende Gheerem de Coninc scepenen van brussele salut ende kennisse der waerheit Cont Sij allen
</begin>
<main>
dat vor ons ziin comen Marie die wilen wijf was gossewinus vten porckine in deen zide Ende lijsbeth hare dochter Met janne den werere haren Man alse met haren montbore in dander zide Ende zin ondereffent ende gheaccordeert vnderlinghe van alle den tebatte ende tviste die Sij vnderlinghe hebben g[h]ehad in wat Manieren dat gheweest heeft Mids den vorwarden die hir na volghen ende bescreuen staen dats [t]e uerstane dat de devorghenoemde jan ende lijsbeth zin wijf zelen hebben ende heffen na de doet der vorghenoemder Mar[ie]n vijr hondert pont den groten tornoisen penninc van der Munten des coninx van vrankerike ouden goeden ende paiablen ouer achtiin penninghe gherekent ochte dewerde daer af in andren goeden paimente jn dien dat devorseide lijsbeth ochte witteghe hoir van hore ende van janne horen Man bliuen leuende na de doet der vorghenoemder Marien want waer dat zake dat de devorghenoemde lijsbeth zonder hoir storue eer devorseide Marie hore moeder zone zoude devorseide jan de vorghenoemde vijr hondert pont niet heffen noch negheerrehande goe[t] Ende alst alsoe gheuiele dat jan ende zin wijf ochte hore hoir hieuen de vorghenomde Somme van penninghe zone zouden zij na de doet der vorghenoemder Marien noch deilen noch in bringhen Maer waer dat zake dat Sij deilen wouden sij mochtent doen Ende dan zouden zij deilen ghelijc dat sij sculdech waren te deilne Ende dit heeft devorseide Marie gheloeft tedoene den vorseiden janne ende lijsbetten zinen wiue ende vast ende ghe[st]ade te houdenne zonder enech ghebrec ghelijc dat vore bescreuen es Ende hiermede heeft devorseide jan vore [ome] ende vore ziin wijf lijsbetten quite ghescouden devorseide Marie van alle der huweleker gheloeften ende vorwarden die die Marie den vorseiden janne ende zinen wiue ochte eneghen van hon beiden hadde gheloeft in hu[w]eliker vorwarden Bekinnende dat hem van alle desen gnoech es ghedaen
</main>
<end>
Jn dewelke orkenscap wij devorseide scepenen onze zeghelle ane dese lettren hebben ghehanghen Ghedaen jnt jaer onsheren alse men screef dusentech driehondert ende achtiene in palmzonauonde op den lesten dach van d[en] maent van merte
</end>