Compilatiecorpus Historisch Nederlands 1.0 (CHN): ambtelijke teksten 1250-1800: brussel_1321_1

<begin>
Het si cont alle den ghenen die dese lettere selen sien ofte horen lesen
</begin>
<main>
dat lizabet van houe ende alijt van stertbeke quamen vore de priorinne vanden wittenionvrouwen vander ordenen van sencte victors ende vore hare late ende droeghen op een huis ende ene hofstat te gherems tsoudelosen behoef ghelijc dat sise heme bewijst hebben die gheleghen es op de hergracht neuen arons tcousmakers ende al dat recht dat sire ane hadden ende op al sulken tseis alsere sculdech es vte te gane ende de priorinne droegt vort op geremme die vore ghenomt es ende dit ghesciede al bi maniggen der priorinne vanden wittenioncvrouwen alse vrouwe ende her gherat de leu willem van beckensele ende heine van beckensele ende ian de lepellere alse late der witenioncvrouwen ende lizabet ende alijt die vore genomt sijn gheloefden gheremme die vor ghenomt es hier af gherechte warscap ende
</main>
<end>
omme dat dit waer was ende ghestedecheit sal hebben soe bidde wi late die vore ghenomt sijn der priorinnen ende den couente gemeinleec vanden wittenioncvrouwen dat sire hare segele ane dese iegenwerdeghe lettere hangen want wi en gene propere segele en hebben ende wi priorinne ende tcouent hebbent herde gerne ghedaen dit was ghedaen in iaer ons heren alse men scrijft dusentech ccc ende xx tsondags in half vasten
</end>