Compilatiecorpus Historisch Nederlands 1.0 (CHN): ambtelijke teksten 1250-1800: brussel_1343_1

<begin>
Cont si allen lieden
</begin>
<main>
dat wi beatrijs meestersse van Sente jans gasthuse in bruesele bruedere ende Sustere van den seluen conuente gheloeft hebben ende ghelouen vore ons ende onse nacomelinghe alse meestersse bruedere ende Sustere ten tide nv ochte die namaels ten tide wesen selen heren willemme van duuenvorde here van oesterhout Ouermids vijf scellinghe grote jaerlijscher Renten die hi ons bewijst heeft jaerlijcs op te heffene ende tontfane ane die husearmemeesters van Sente ghodelen van welken vijf scellinghe grote vorescreuen wi jaerlijcs vte gheuen selen tote Eere pietancien te broede te Spisen ende te wijne den armen zieken die daer int vorseide gasthuus sijn selen ende den joncfrouwen op den asschdach ende die Capellaen sal hebben van den vorseiden vijf scellinghe grote viere peninghe grote op den seluen dach dit es te verstane alsoe langhe alse her willem van duuenvorde vorscreuen leuet Ende na sine doet salmen dese gheheele pietancie deilen op dien dach dat sijn jaerghetide vallen sal ende dan sal die capellaen doen sijn jaerghetide ende bidden vore hem in sire messen ende doen den armen sieken die de pietancie hebben selen narnstelike sijns ghedinken ende vore hem bidden Ende kennen op ons ende onse nacomelinghe van den vorghenoemden gasthuus gheuielt dat niet wesen en moet dat wi niet en daden alse vorscreuen es alsoe verre als ment wetteleke op ons beproeuen mochte dat wi dies jaers naest volghende niet hebben noch op heffen en mochten vanden vorseiden vijf scellinghe groten in negheerre manieren
</main>
<end>
jn orconscape der waerheit beseghelt met onsen ghemeinen seghele Ghegheuen jnt jaer ons heren Dusent Driehondert drie ende viertech op Sente dyonijs auont
</end>