Compilatiecorpus Historisch Nederlands 1.0 (CHN): ambtelijke teksten 1250-1800: brussel_1343_2

<begin>
Cont si allen lieden
</begin>
<main>
dat wi arnout Cureit jn den wijngart ten beghinen bi bruesele Ende viere prjncipale meesterssen des vorseids hoefs ende gheertruut van Campenhoue meestersse der kisten jn den vorseiden hof gheloeft hebben ende ghelouen vore ons ende onse nacomelinghe alse meestersse der kisten vorseit ten tide nv ochte die namaels ten tide wesen selen heren willemme van duuenvorde here van oesterhout Ouermids vijf scellinghe grote jaerlijcscher Renten die hi ons bewijst heeft jaerlijcs op te heffene ende tontfane ane die huse arme meesters van Sente guedilen van welken vijf scellinghen groten vorescreuen wi jaerlijcs wi vte gheuen selen te pietancien te broede ende te spijsen den maten joncfrouwen die der kisten behoeuen alle weken omme doelachtech te sijn ane alle hare bedinghe ende penitentien Ende kinnen op ons ende onse nacomelinghe meestersse vander kisten vorseit gheuielt dat niet wesen en moet dat wi niet en daden alse vorscreuen es alsoe verre als ment wetteleke op ons beproeuen mochte dat wi dies jaers naest volghende niet hebben noch op heffen en mochten van den vorseiden vijf scellinghe groten jn negherre manieren
</main>
<end>
jn orconscape der waerheit soe hebbic arnout Cureit vorscreuen dese lettere beseghelt met minen seghele Ghegheuen jnt jaer ons heren Dusent driehondert Drie ende viertech op Sente dyonijs auont
</end>