Compilatiecorpus Historisch Nederlands 1.0 (CHN): ambtelijke teksten 1250-1800: brussel_1343_3

<begin>
Cont si allen lieden
</begin>
<main>
dat wi Claus mayhu ende jan mattaert huse aerme meestere van der Capellen buten den mure van bruecele gheloeft hebben ende ghelouen vore ons ende onse nacomelinghe alse huse aerme meesters ten tide nv ochte die namaels wesen selen heren willemme van duuenvorde here van Oesterhout Ouermids viere ende twintech scellinghe grote jaerlijcscher Renten die hi ons bewijst heeft jaerlijcs op te heffene ende tontfane ane die huse arme meesters van sente guedilen van den welken viere ende twintech scellinghe grote vorscreuen wij jaerlijcs deylen selen ende gheuen jn alre zielen daghe te Rocken den alre armsten ende noettorfsten van der Prochien van der capellen omme euweleken vor hem te biddene Ende kinnen op ons ende onse nacomelinghe alse huse arme meesters ghevielt dat niet wesen en moet Dat wi niet en daden alse vorscreuen es alsoe verre alse ment wetteleke op ons beproeuen mochte dat wi dies jaers niet hebben noch heffen en mochten jn negheerre manieren
</main>
<end>
Jn orconscape der waerheit bezeghelt met onser huse armer zeghele Ghegheuen jnt jaer ons heren Dusent Driehondert Drie ende viertech op sente dyonijs auonde
</end>