Compilatiecorpus Historisch Nederlands 1.0 (CHN): ambtelijke teksten 1250-1800: brussel_1343_4

<begin>
Cont si allen lieden
</begin>
<main>
dat wij jan calenoert ende jan danijs huusarme meestre van Sente gilijs tobbruesele gheloeft hebben ende ghelouen vore ons ende vore onse nacomelinghe alse huuse aerme meesters ten tiden nv ochte die namaels ten tide wesen selen heren willemme van duuenvorde here van Oesterhout ouermids Sesse scellinghe grote jaerlijcscher Renten die hi ons bewijst heeft jaerlijcs op te heffene ende tontfane ane die huusearme meesters van Sente guedilen vanden welken Sesse scellinghe grote vorscreuen wi jaerlijcs deylen selen ende gheuen jn alre zielen daghe te Rocken den alre armsten ende noettorfsten van der prochien van Sente gilijs vorseit omme eweleken vore hem te biddene ende kinnen op ons ende onse nacomelinghe alse husearme meesters gheuielt dat niet wesen en moet dat wi niet en daden alse vorscreuen es alsoe verre alse ment wetteleke op ons beproeuen mochte dat wi dies jaers niet hebben noch heffen en mochten van den vorseiden Sesse scellinghe groten in negheerre manieren
</main>
<end>
jn orconscape der waerheit beseghelt met onser husearmer zeghele Ghegheuen jnt jaer ons heren Dusent Driehondert Drie ende viertech op Sente dyonijs auont
</end>