Compilatiecorpus Historisch Nederlands 1.0 (CHN): ambtelijke teksten 1250-1800: brussel_1343_5

<begin>
Cond si allen den ghenen die desen brief zullen zien ende hoeren lesen
</begin>
<main>
dat wi ghiisbrecht taye Ende Engbrecht vanden spieghele huusarmeisters van sente guedelen ghelouen uor ons ende onse nacomelinghe huusarmeistere ten tiden nv of die namaels wesen sullen heren willem van duuenvorde here van oesterhout ouermids vier pond grote jairliicster Renten die hi ons ghegheuen ende bewijst heeft op goeden zekeren pand ende dien wi Ontfaen hebben van welken vier pond grote wi jairliics deilen zullen twee pond grote jn alre zielen daghe te Rocken ende Een pond grote op den seluen dach in scoenen ende in hemden ende dat vierde pond grote te deilen te korsauonde in vleische ende in broede Ende kennen op ons ende onse nacomelinghe huusarmeisters gheuielt dat niet wesen en Moet dat wi niet en daden alse voirscreuen is alsoe verre alsment wittelike op ons beproeuen mochte dat wi dies jairs niet hebben noch heffen mochten
</main>
<begin>
jn orconde der wairheit bezeghelt met onser huusarmer zeghele Ghegheuen jnt jaer ons heren dusent drie honderd drie ende viertich op sente dyoniis dach
</end>