Compilatiecorpus Historisch Nederlands 1.0 (CHN): ambtelijke teksten 1250-1800: brussel_1343_6

<begin>
Allen den ghenen die dese letteren selen sien ende horen lesen ghisebrecht taye ende jmbrecht van den spieghele saluyt ende kinnesse der waerheit Cont si allen
</begin>
<main>
want Een mechtich man her willem van duuenvorde here van Oesterhout ghecocht heeft goede ende die hi betaelt heeft ende vergouden met sinen Eyghenen penninghen De welke goede wij van sinen weghen ontfaen hebben ende daer toe Comen sijn met rechte ende met vonnesse jn wat manieren dat die goede gheleghen sijn te bestadene te gheuene ende te bekeerne erffeleken ende euweleken jn die Eere gods ghelijc alse die brieue in hebben diere op ghemaect sijn Soe ghelouen wi vore ons ende onse nacomelinghe alse huse arme meesters van sente guedilen in bruecele ten tide nv ochte die namaels ten tide wesen selen dat wi jaerlijcs euweleken ende erffeleken van den vorseiden goede gheuen selen jn name alse huse armeesters vorscreuen tere Capelrien die her willem van duuenvorde vorseit ghesticht ende gheordineert heeft jn die ere gods binnen sire woninghen gheleghen naest Godeuerts van mons husinghen opwaerts te Coudenberghe twee ende twintech scellinghe grote Die ene helecht te kerssauonde Ende dandere helecht tsente jans messe baptiste jn midden zomere Dats te verstane lande ghelike vore Elc pondt grote Dertien scilde ende een derdendeel van Eenen scilde ende elken penningh grote vore Dertech penninghe Ende elc pont grote vore Dertech Pont Met sulker vorwaerden ware dat sake dat gheviele dies niet sijn en moet dat alselke goede alse wi ontfaen hebben jn name alse husearme meesters van heren willemme van duuenvorde vorscreuen Ergherden ochte te nieute ghinghen jn wat manieren dat ware soe soude die Capellaen die de vorseide Capelrie hebben ochte verdienen soude Dien scade hulpe draghen Ponde ghelike Oec met sulker conditien ware dat sake dat die Capellaen die de Capelrie vorscreuen hebben ochte verdienen soude niet en diende noch en dade alse hi sculdech ware te doene ende men oppenbare fauten ende ghebrec in hem vonde dat hi dies jaers niet opheffen noch ontfaen en sal van dien vorseiden ghelde ane die vorseide huse arme meesters die nv sijn ochte namaels ten tide sijn selen jn ne gheerre manieren
</main>
<end>
jn Orconscape der waerheit beseghelt metten seghele der huse armere van sente guedilen vorscreuen Ghegheuen jnt jaer ons heren Dusent Driehondert Drie ende viertech op sente dyonijs dach
</end>