Compilatiecorpus Historisch Nederlands 1.0 (CHN): ambtelijke teksten 1250-1800: brussel_1343_7

<begin>
Cont si allen lieden
</begin>
<main>
dat wi ghisebrecht taye ende jmbrecht vanden spieghele gheloeft hebben ende ghelouen jn goeden trouwen vore ons ende on[se] nacomelinghe alse huse arme meesters van sente guedilen in bruecele ten tide nv ende namaels ten tide sijn selen te gheuene ende te betaelne erffeleken ende euweleken den kerkemeesters vander kerken ende vander fabriken van sente guedilen in bruecele die nv sijn ochte namaels ten tide wesen selen viere Scelling grote siaers te gheuene ghelijc dat die brief in hout diere op ghemaect es dene helecht te kerssauonde ende dander helecht te sente jans messe jn midden zo[me]r dats te verstane lande ghelike vore elc pont grote dertien scilde ende een derdendeel van enen scilde ende elken penningh grote vore dertech penninghe ende elc pont grote vore dertech pont van alselken goede alse ons een mechtich man her willem van duuenvorde here van oesterhout ghecocht heeft ende met sinen eyghenen penninghen betaelt heeft ende daer wi met Rechte ende met vonnesse toe comen sijn jn wat manieren dat die goede gheleghen sijn Ende ware dat sake dat gheuiele dies niet sijn en moet dat alselke goede alse wi ontfaen hebben van heren willemme van duuenvorde vorscreuen ergherden ochte te nieute ghinghen jn wat manieren dat ware zo souden de vorseide kerkemeesters vander kerken ende fabriken weghen voreghenoemt die Scade hulpen draghen ponde ghelike Voert ware dat sake dat die vorseide kerkemeesters die nv sijn ochte namaels ten tide sijn selen jn ghebreke waren van eneghen pointe te doene ghelijc dat de brief in hout die de vorseide kerkemeesters metter Capittelen seghele van Sente guedelen in bruecele daer af beseghelt hebben dat si dies jaers naest volghende niet op heffen noch op boren en selen vanden vorseiden ghelde in ne gheerre manieren
</main>
<end>
jn orconscape der waerheit beseghelt metter huse armer seghele van sente guedilen voreghenoemt ghegheuen jnt jaer ons heren Dusent driehondert viertech ende drie op sente dyonijs dach
</end>