Compilatiecorpus Historisch Nederlands 1.0 (CHN): ambtelijke teksten 1250-1800: brussel_1366_1

<begin>
Cont si allen lieden
</begin>
<main>
dat Wij lauwereins de wedeghe Ende jan de witte huusaerme[ ]meestere vander prochien van sente guerx jn bruecele kinnen dat wij ontfaen hebbe ter huusaermere beh[ou]f met scepenen brieuen van brutenghem van lijsbetten wilen jans dochter was van stroembeke die te br[u]ecele jn sente jans hof woent Een huus ende hofstat jn al diere manieren dat gheleghen es jn de prochie [va]n volenbeke neuenjans bastaerts hof Ende vort meer noch een dachwant ende viue ende twentech [r]oeden lants luttel meer oft men welc lant hout jan vanden perre ghelijc dat gheleghen es opt dal jn d[en]e side neuen jans meyen lant Ende jn dander side neuen jan troests lant Ende sijn hiertoe comen bi man[in]ghen smeyers ende bi wijsdome der scepen ghelijc de scepenen lettere sprect diere op ghemaect es ende [] tonsweert hebben waerbi dat wij huusaerme mestere voren ghenoempt ghelouen vor ons ende vor onse nacomelinghe als van der vorseider huusaermere weghen na lijsbetten van stroembeke [] vorenghenoempt de sente guerx jnde kerke jaerlex erflec tekersauende dertech scellinghe borseghelts de[r] vorseider lijsbetten ende haers vader ende hare moeder ende haer brueder Jaerghetiden daer met te d[o]ene op selker condicien waert also dat dit voren ghenoemde goet ergherde oft af name jn enegher [m]enieren so dat wij den seins niet vercrighen en conden so souden dese voren ghenoempde jaerghet[id]en Cost ende scade hulpen ghelden ende draghen na de groete van haren seinse die siere jaerlex op heb[b]en Altoes sonder arghelist
</main>
<end>
Ende omme dat dit vast ende ghestade bliuen sal ghelijc dat voren bescreu[en] steet so hebben wij huusarme meestere voren ghenoempt onser huusarmere zeghel ane dese lettere [g]hehanghen jn kinnessen der waerheit Dit was ghedaen jnt jaer ons heren als men screef M cc[c] sesse ende tsestech xxiij daghe jndemaent van januario
</end>