Compilatiecorpus Historisch Nederlands 1.0 (CHN): ambtelijke teksten 1250-1800: brussel_1366_2

<begin>
Cont si allen lieden
</begin>
<main>
dat Wij lauwereins de wedeghe Ende jan de Witte huusaerme meestere Van der prochien van sente guerx jnbruecele kinnen dat wij ontfaen hebben ter huusarmere behoef met scepenen brieuen van brucenghem van lijsbetten wilen jans dochter was van stroembeke die te bruecele jn sente jans hof woent Een huus ende hofstat jn al diere manieren dat gheleghen es jn de prochie van volenbeke neuen jans bastaerts hof Ende vortmeer noch een dachwant en viue ende twintech Roeden lants luttel meer oft men welc lant hout jan van den perre ghelijc dat gheleghen es opt dal jndene side neuen jans meys lant Ende jn dander side neuen jan troests lant Ende sijn hier toe comen bi maninghen smeyers Ende bi wijsdome der scepenen ghelijc dat de scepene lettere sprect diere op ghemaect es ende die wij te ons weert hebben waer bi dat wij huusarme meestere voren ghenoempt ghelouen vor ons ende vore onse nacomelinghe als van der vorseider huusaermere weghen Na lijsbetten van stroembeke lijf voren ghenoempt jnde kerke van sente goedelen jaerlex erflec twentech scellinghe borseghelts altoes te kersauonde te betaelne ten wiuen te hulpen diemen den ghenen gheeft te drinkene die tonsen here gheweest hebben Met selker condicien waert also dat dit voren ghenoemde goet Ergherde oft af name jn Enegher menieren so dat wij den seins niet vercrighen en conden so soude dese vorseide kerke Cost ende scade hulpen ghelden ende draghen na na de groete van den seinse die siere jaerlex op heeft altoes sonder arghelist
</main>
<end>
Ende omme dat dit vast ende ghestede bliuen sal ghelijc dat voren bescreuen steet so hebben wij huusaerme meestere voren ghenoempt onser huusaermere zeghel ane dese lettere ghehanghen jn kinnessen der waerheit Dit was ghedaen jnt jaer ons heren als men screef M ccc sesse ende tsestech xxiij daghe jn de maent van januario
</end>