Compilatiecorpus Historisch Nederlands 1.0 (CHN): ambtelijke teksten 1250-1800: brussel_1367_1

<begin>
Cont si allen lieden die dese letteren selen zien ochte horen lesen
</begin>
<main>
Dat wij henric van AA die groefsmet Godeuaert van meersele die goutsmet Ende gherem van der noet Jans zone was vander noet de scildere prouisoers der broederscap mins heren sente loys in bruesele ontfaen hebben in almoesenen ter voerseider broederscap beof van henricken vander brugghen van zauenthen twee oude scilde goet ende gherecht ochte de weerde daer af alle Jare erfeleke te betaelne half te sente Jans misse ende half te kersauonde De welke twee oude scilde voerseit ons ghequijt ende bewijst heeft die voerseide henric van der brugghen die men heet henric de clerc op een hofstade metten huse daer op staende gheleghen jeghen des cantersteen ouer opten horrec tusschen de goede Gherats van frazene tsloetmakers aen deen side Ende de goede lijsbetten van viluoerden ende Jans van Erpe ghehuuschen aen dander side ghelijc de scepenen brief in heeft die wij daer af ontfaen hebben Waer bi wij prouisoers voerseit ghelouen voer ons ende voer onse nacomelinghen van der voerseider broederscap weghen onser vrouwen werk te sente Goedelen Enen ouden scilt ochte de weerde daer af alle Jare erfeleke te betaelne ten terminen die voersproken sijn Met selker condicien gheuielt dat de voerseide pant argherde in al ochte in dele Soe soude dat voerseide werc van sente goedelen voerseit die scade helpen draghen ghelande ghelijc na de groete van haren ghelde
</main>
<end>
Ende omme dat dit vaste ende ghestade sal bliuen ghehouden soe hebben wij prouisoers voerseit dese letteren beseghelt metten seghele der broederscap mijns heren sente loys voerseit Jn kennissen der waerheit Dit was ghedaen int Jaer ons heren dusentech CCC tsestech ende zeuene opten zesse ende twintechsten dach vander maent van oeghste
</end>