Compilatiecorpus Historisch Nederlands 1.0 (CHN): ambtelijke teksten 1250-1800: brussel_1367_2

<begin>
Cont si allen lieden die dese letteren selen zien ochte horen lesen
</begin>
<main>
Dat wij Henric van AA die groofsmet Godeuert van Moersele die goutsmet Ende Gherem vandernoet Jans zone was vander noet die scildere Prouisoers der bruederscap mijns heren sente loys in bruesele Ontfaen hebben in aelmoesenen ter voerseider bruederscap boef van boudene van os den cledermakere Een dachwant lants luttel min ochte meer ghelegen buten sente Goedelen poerte jnde nouwestrate tusschen de goede willems van aelst Ende de goede Jans herdenacke ghelijc dat tvoerseide dachwant lants gielijs vter coekenen aldaer erfeleec vercreech Jeghen Gerwiden van boesdale Ende ghelijct dat den voerseide boudene aldaer wale bewijst was erfeleec te houdene ende eweleec te besittene opten cheins die daer van rechte es vte te ghane ghelijc die brieue Jn hebben die wij daer af ontfaen hebben waer bi wij voerseide Prouisoers ghelouen voer ons ende voer onse nacomelinghen vander voerseider bruederscap weghen Der Jerster missen die men heet die vroechmisse Jn sente goedelen kerke te bruesele tien scellinghe tsiaers ghewoenleker munten altoes te kersauonde te betaelne ghemeinleec jn borsen lopende Met selker conditien gheuielt dat die voerseide pant argherde in al ochte in dele Soe soude die voerseide vroechmisse die scade helpen draghen ghelande ghelijc na de groette van haren ghelde
</main>
<end>
Ende omme dat dit vaste ende ghestade sal bliuen ghehouden Soe hebben wij Prouisoers voerseit dese letteren beseghelt metten seghele der broederscap mijns heren sente loys voerseit jn kinnissen der waerheit Dit was ghedaen jnt jaer ons heren dusentech driehondert tsestech ende zeuene opten zesse ende twintechsten dach van septembre
</end>