Compilatiecorpus Historisch Nederlands 1.0 (CHN): ambtelijke teksten 1250-1800: brussel_1367_3

<begin>
Cont si allen
</begin>
<main>
dat wij heinrec van AA de grouesmed Gherem vander noet deschildere Ende godeuert van morsele prouisoers der armere vander bruederscap van Sente loys in bruessele bekinnen dat wij ontfaen hebben in aelmoesenen ter vorseider armere boef van Reyneren clutinghe willen zone was Reynere clutings tseghelere ende van Joffrouwen Jannen weghen sijns wijfs twintech guldene penninghe florine van florenchen ochte de werde daer af Erfeleke Renten al jare te heffene ende te hebbene half Sente jans messe ende half te kersauonde op ene hofstad met den husen daer op staende gheleghen bider Coelmaerct daer men gheet ter ouermolen porten wert tuschen den goede des selfs Reyners dat hi vercrech jeghen Janne den wemmelere op dene side ende den goede joffrouwen lijsbetten droeghboschs op dander side ghelijc dat scepene brieue van bruessele in houden die wij daer af ontfaen hebben Van welken twintech florinen van florenchen erfelec cheins wi ghelouen te betalene alle jare teuweliken daghen vander armere weghen van Sente loys vorseit den gasthuse vanden armere wiuen in de perkemenstrate gheleghen een virendeel van enen guldene florijn van florenchen vorseit ten terminen die verspreken sijn Met selken condicien ende vorwarden gheuielt namaels des niet sijn en moete dat de vorseide hofstad met den husen alsoe sere ergherden dat men de vorseide cheins van twintech guldene tsiars daer op niet bereiken en conse ende men daer af ware in ghebreke in deele ochte in al dat dan de vorseide gasthuse vander armere wiuen alselke ghebrect selen helpen met draghen na de ghelande van sijnen dele
</main>
<end>
Ghegheuen onder der vorseider armere zeghel van Sente loys Jn kinnessen der waeheit doe men screef M CCC sestech ende seuene op den xij dach van decembre
</end>